തിരുവനന്തപുരം: കേരള സര്‍വകലാശാലയില്‍ മൂല്യനിര്‍ണയത്തിനായി കൊണ്ടുപോയ എം.ബി.എ പരീക്ഷയുടെ ഉത്തരക്കടലാസുകള്‍ അധ്യാപകനില്‍ നിന്ന് നഷ്ടമായി. 71 എംബിഎ വിദ്യാര്‍ഥികളുടെ ഉത്തരക്കടലാസുകളാണ് കാണാതായത്. പേപ്പര്‍ നഷ്ടമായതോടെ വീണ്ടും പരീക്ഷ എഴുതണമെന്നാണ് വിദ്യാര്‍ഥികള്‍ക്ക് ലഭിച്ചിരിക്കുന്ന നിര്‍ദേശം.

2024 മെയില്‍ നടന്ന അവസാന സെമസ്റ്റര്‍ പ്രോജക്ട് ഫിനാന്‍സ് പരീക്ഷയുടെ ഉത്തരക്കടലാസുകളാണ് നഷ്ടമായിരിക്കുന്നത്. സര്‍വകലാശാലയ്ക്ക് കീഴിലുള്ള അഞ്ചു കോളജുകളിലെ വിദ്യാര്‍ഥികളുടെ ഉത്തരക്കടലാസുകളാണ് നഷ്ടപ്പെട്ടത്. മൂല്യനിര്‍ണയത്തിനു ശേഷം പരീക്ഷാപേപ്പറുകള്‍ നഷ്ടമായെന്നാണ് അധ്യാപകന്റെ വിശദീകരണം. അധ്യാപകനു പറ്റിയ വീഴ്ചയുടെ പേരില്‍ കുട്ടികള്‍ വീണ്ടും പരീക്ഷ എഴുതേണ്ട ഗതികേടിലാണ്. 

ഉത്തരക്കടലാസ് നഷ്ടമായതിന്റെ പേരില്‍ ആ വിഷയത്തിന്റെ പരീക്ഷ വീണ്ടും എഴുതണമെന്ന് സൂചിപ്പിച്ച ഇ മെയില്‍ സന്ദേശം വിദ്യാര്‍ഥികള്‍ക്ക് ലഭിച്ചു. ഏപ്രില്‍ ഏഴിനാണ് പരീക്ഷ വച്ചിരിക്കുന്നത്. രാവിലെ 9.30 മുതല്‍ 12.30 വരെയാണ് സമയം. വിദ്യാര്‍ഥികളുടെ മൂന്ന്, നാല് സെമസ്റ്ററുകളുടെ ഫലം ഇതുവരെയും വന്നിട്ടില്ല. സര്‍വകലാശാലയില്‍ അന്വേഷിച്ചപ്പോഴാണ് ഉത്തരക്കടലാസ് നഷ്ടപ്പെട്ടെന്നും വീണ്ടും പരീക്ഷ എഴുതേണ്ടിവരുമെന്നും വിദ്യാര്‍ഥികള്‍ അറിഞ്ഞത്.

എല്ലാ വിദ്യാര്‍ഥികള്‍ക്കും ഇ മെയില്‍ ലഭിച്ചിട്ടുമില്ല. എന്തായാലും പകരം പരീക്ഷ എഴുതാന്‍ നിര്‍വാഹമില്ലെന്ന നിലപാടാ
ണ് വിദ്യാര്‍ഥികള്‍ക്ക്. പരീക്ഷ എഴുതിയ വിദ്യാര്‍ഥികള്‍ പലരും വിദേശത്തേക്ക് ഉപരിപഠനത്തിനായി പോവുകയും ചെയ്തു. ജോലി തേടിയിറങ്ങിയവരാവട്ടെ സര്‍ട്ടിഫിക്കറ്റ് ലഭിക്കാതെ കുടുങ്ങിയിരിക്കുകയാണ്. എന്താണ് തുടര്‍നടപടി എന്നാണ് ഈ വിഷയത്തില്‍ ഇനി അറിയേണ്ടത്. ഗുരുതരവീഴ്ച വരുത്തിയ അധ്യാപകനെതിരേ എന്ത് നടപടി സ്വീകരിക്കുമെന്നും അറിയില്ല.