തിരുവനന്തപുരം: ലഹരി ഉപയോഗം തടയുന്നതിനായി പുതിയ പദ്ധതിയുമായി രംഗത്തെത്തിയിരിക്കുകയാണ് കേരള സര്‍വകലാശാല. ലഹരി ഉപയോഗിക്കില്ലെന്ന സത്യവാങ്മൂലം നല്‍കിയാല്‍ മാത്രമായിരിക്കും ഇനി മുതല്‍ സര്‍വകലാശാലക്ക് കീഴിലുള്ള കോളേജുകളില്‍ അഡ്മിഷന്‍ ലഭിക്കുക. കൂടാതെ, എല്ലാ അഫിലിയേറ്റഡ് കോളേജുകളിലും സൗഹൃദ ക്ലബുകള്‍ സ്ഥാപിക്കുമെന്നും, ലഹരി വിരുദ്ധ കോളേജുകള്‍ക്ക് അവാര്‍ഡ് നല്‍കുമെന്നും ഇന്ന് ചേര്‍ന്ന സര്‍വകലാശാല സെനറ്റ് യോഗത്തിൽ തീരുമാനമെടുത്തതായി സര്‍വകലാശാല അറിയിച്ചു.  

കേരള സര്‍വകലാശാലക്ക് കീഴിലുള്ള ക്യാമ്പസുകളില്‍ നിന്ന് ലഹരി ഉപയോഗം തുടച്ചു നീക്കാനാണ് ഈ തീരുമാനം. അടുത്ത അധ്യായന വര്‍ഷം മുതല്‍ തന്നെ ഈ തീരുമാനം നടപ്പിലാക്കുമെന്നാണ് സൂചന. ലഹരി ഉപയോഗിക്കില്ലെന്ന സത്യവാങ്മൂലം എഴുതി നല്‍കാതെ ഇനി അഫിലിയേറ്റഡ് കോളേജുകളിലും അഡ്മിഷന്‍ ലഭിക്കില്ല. 

സംസ്ഥാനത്ത് ക്യാമ്പസുകള്‍ കേന്ദ്രീകരിച്ച് പ്രവര്‍ത്തിക്കുന്ന ലഹരി മാഫിയയെ വലയിലാക്കാനുള്ള ശ്രമങ്ങള്‍ ഊര്‍ജിതമായി നടക്കുന്നുണ്ട്. പൊലിസും എക്‌സൈസും ഇതുനുള്ള ശ്രമങ്ങള്‍ നടത്തിവരികയാണ്. അതേസമയം, ക്യാമ്പസുകളിലെ ലഹരി ഉപയോഗം പൂര്‍ണ്ണമായും  തടയിടുന്നതിന് ചില വെല്ലുവിളികളുണ്ട്. ഈ സാഹചര്യത്തില്‍ കേരള സര്‍വകലാശാലയുടെ നീക്കം പ്രശംസയര്‍ഹിക്കുന്നതാണ്.

Kerala University has announced a new admission policy, requiring students to submit an affidavit swearing not to use drugs.