ചെന്നൈ: ഐപിഎല്ലിൽ റോയൽ ചലഞ്ചേഴ്‌സ് ബെംഗളൂരുവിന് തുടർച്ചയായ രണ്ടാം വിജയം. രണ്ടാം മത്സരത്തിൽ ചെന്നൈ സൂപ്പർ കിങ്സിനെ 50 റൺസിനാണ് ആർസിബി വീഴ്ത്തിയത്. ചെന്നൈയുടെ തട്ടകമായ എംഎ ചിദംബരം സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ബെംഗളൂരു 20 ഓവറിൽ ഏഴ് വിക്കറ്റ് നഷ്ടത്തിൽ 196 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ചെന്നൈ ഇന്നിങ്‌സ് 20 ഓവറിൽ എട്ട് വിക്കറ്റ് നഷ്ടത്തിൽ 146 റൺസിൽ അവസാനിക്കുകയായിരുന്നു. നീണ്ട 17 വർഷങ്ങൾക്ക് ശേഷമാണ്‌ ആർസിബി ചെന്നൈക്കെതിരെ അവരുടെ തട്ടകത്തിൽ ഒരു മത്സരം വിജയിക്കുന്നത്.

ബെംഗളൂരുവിനായി ജോഷ് ഹേസൽവുഡ് മൂന്ന് വിക്കറ്റും യാഷ് ദയാൽ, ലിയാം ലിവിങ്സ്റ്റൺ എന്നിവർ ഇരട്ട വിക്കറ്റുകളും നേടി തിളങ്ങിയപ്പോൾ ചെന്നൈ ബാറ്റിംഗ് നിര തകർന്നടിയുകയായിരുന്നു. ഭുവനേശ്വർ കുമാർ ഒരു വിക്കറ്റും സ്വന്തമാക്കി. ചെന്നൈക്കായി 31 പന്തിൽ 41 റൺസ് നേടി രചിന്ത രവീന്ദ്ര മികച്ച പ്രകടനം നടത്തി. അഞ്ചു ഫോറുകളാണ് താരം നേടിയത്. എംഎസ് ധോണി മൂന്ന് ഫോറുകളും രണ്ട് സിക്സുകളും ഉൾപ്പടെ 16 പന്തിൽ 30 റൺസും രവീന്ദ്ര ജഡേജ 19 പന്തിൽ 25 റൺസും നേടി. 

ആദ്യം ബാറ്റ് ചെയ്ത ബെംഗളൂരു ക്യാപ്റ്റൻ രജത് പടിദാറിന്റെ അർദ്ധ സെഞ്ച്വറി കരുത്തിലാണ് മികച്ച സ്കോർ നേടിയത്. 32 പന്തിൽ 51 റൺസാണ് പടിദാർ നേടിയത്. നാല് ഫോറുകളും മൂന്ന് സിക്സുകളുമാണ്‌ ആർസിബി ക്യാപ്റ്റൻ നേടിയത്. ഫിൽ സാൾട്ട് 16 പന്തിൽ 32 റൺസും വിരാട് കോഹ്‌ലി 30 പന്തിൽ 31 റൺസും നേടി മികച്ച ടോട്ടൽ പടുത്തുയർത്തുന്നതിൽ നിർണായകമായി. ചെന്നൈ സൂപ്പർ കിങ്‌സ് ബൗളിങ്ങിൽ നൂർ അഹമ്മദ് മൂന്ന് വിക്കറ്റും മതീഷ പതിരാണ രണ്ട് വിക്കറ്റുകളും വീഴ്ത്തി തിളങ്ങി. ഖലീൽ മുഹമ്മദ്, ആർ അശ്വിൻ എന്നിവർ ഓരോ വീതം വിക്കറ്റും നേടി.

മാർച്ച്‌ 30ന് രാജസ്ഥാൻ റോയൽസിനെതിരെയാണ് ചെന്നൈയുടെ അടുത്ത മത്സരം. ഗുഹാഹത്തിയിലാണ് മത്സരം നടക്കുന്നത്. ഏപ്രിൽ രണ്ടിന് ഗുജറാത്ത്‌ ടൈറ്റൻസിനെതിരെയാണ് ആർസിബിയുടെ അടുത്ത മത്സരം. ബെംഗളൂരുവിന്റെ തട്ടകമായ ചിന്നസ്വാമി സ്റ്റേഡിയമാണ് വേദി.

Royal Chalangers Banglore Beat Chennai Super Kings IPL 2025