റിയാദ്: അൽ നസർ നായകൻ ക്രിസ്റ്റ്യാനോ റൊണാൾഡോ മേജർ ലീഗ് സോക്കറിൽ ചേരുന്നതിനെക്കുറിച്ചുള്ള തന്റെ അഭിപ്രായം പറയുകയാണ് മുൻ അർജന്റൈൻ താരം സെർജിയോ അഗ്യൂറോ. റൊണാൾഡോ എംഎൽഎസിലേക്ക് പോവാൻ സാധ്യത കുറവാണെന്നാണ് അഗ്യൂറോ പറഞ്ഞത്. ലയണൽ മെസി എംഎൽഎസിലേക്ക് പോയപ്പോൾ ലീഗിന് വളരെയധികം പ്രാധാന്യം ലഭിച്ചുവെന്നും മുൻ അർജന്റൈൻ താരം പറഞ്ഞു. ഗോളിന് നൽകിയ അഭിമുഖത്തത്തിൽ സംസാരിക്കുകയായിരുന്നു അഗ്യൂറോ. 

'റൊണാൾഡോ എംഎൽഎസിലേക്ക് പോകുമെന്ന് ഞാൻ കരുതുന്നില്ല. മെസിയുടെ വരവ് ഇതിനോടകം തന്നെ മേജർ ലീഗ് സോക്കറിനെ വളരെയധികം ഉയരങ്ങളിൽ എത്തിച്ചു. ഈ ലീഗ് കൂടുതൽ കൂടുതൽ മത്സരാത്മകമാവുകയും ക്രമേണ വലിയ താരങ്ങൾ ഇങ്ങോട്ട് വരുകയും ചെയ്തു,' സെർജിയോ അഗ്യൂറോ പറഞ്ഞു. 

2023ലാണ് മെസി പിഎസ്ജിയിൽ നിന്നും മയാമിയിൽ എത്തുന്നത്. മെസിയുടെ വരവിനു പിന്നാലെ മേജർ ലീഗ് സോക്കറിന് കൃത്യമായ ഒരു മേൽവിലാസം ഉണ്ടാക്കിയെടുക്കാൻ സാധിച്ചിരുന്നു. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു മയാമി നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതുവരെ അമേരിക്കൻ ക്ലബിനൊപ്പം 39 മത്സരങ്ങളിൽ നിന്നും 34 ഗോളുകളും 18 അസിസ്റ്റുകളും ആണ് മെസി നേടിയത്.