കാബൂള്‍: സ്ത്രീകള്‍ക്കും പെണ്‍കുട്ടികള്‍ക്കും വിദ്യാഭ്യാസം വിലക്കാന്‍ ഒരു നിലക്കുള്ള ഒഴിവുകിഴിവുമില്ലെന്ന് താലിബാന്‍ ഉപനേതാവ്  ഷേര്‍ അബ്ബാസ് സ്താനിക്‌സായി. വിദേശകാര്യ മന്ത്രാലയത്തിലെ പൊളിറ്റിക്കല്‍ സെക്രട്ടറിയാണ് ഷേര്‍ അബ്ബാസ്. തെക്കുകിഴക്കന്‍ ഖോസ്റ്റ് പ്രവിശ്യയിലെ ഒരു ചടങ്ങിനെ അഭിസംഭോധന ചെയ്യവേയായിരുന്നു ഇദ്ദേഹത്തിന്റെ പരാമര്‍ശം.

സ്ത്രീകള്‍ക്കും പെണ്‍കുട്ടികള്‍ക്കും വിദ്യാഭ്യാസം നിഷേധിക്കാന്‍ ഒരു കാരണവുമില്ലെന്നും മുന്‍കാലങ്ങളിലും ഇതിന് ന്യായീകരണമില്ലെന്നും അങ്ങനെയൊരു കാരണം ഉണ്ടാകരുതെന്നും അദ്ദേഹം ചടങ്ങിനിടെ സദസ്സിനോട് പറഞ്ഞു.

ആറാം ക്ലാസിന് ശേഷം സ്ത്രീകള്‍ വിദ്യാഭ്യാസം നേടുന്നത് നേരത്തേ സര്‍ക്കാര്‍ വിലക്കിയിരുന്നു. കഴിഞ്ഞ സെപ്റ്റംബറില്‍ സ്ത്രീകള്‍ക്കുള്ള മെഡിക്കല്‍ പരിശീലനവും കോഴ്‌സുകളും അധികൃതര്‍ നിര്‍ത്തിയതായി റിപ്പോര്‍ട്ടുകളുണ്ടായിരുന്നു.

'സ്ത്രീ വിദ്യാഭ്യാസത്തിന്റെ വാതിലുകള്‍ തുറക്കാന്‍ ഞങ്ങള്‍ നേതൃത്വത്തോട് വീണ്ടും ആവശ്യപ്പെടുകയാണ്.  '40 ദശലക്ഷം ജനസംഖ്യയില്‍ 20 ദശലക്ഷം ആളുകളോട് ഞങ്ങള്‍ അനീതി കാണിക്കുന്നു, അവരെ ഇല്ലാതാക്കുന്നു. അവരുടെ എല്ലാ അവകാശങ്ങളും ഹനിക്കുന്നു.' ഇത് ഇസ്ലാമിക നിയമത്തിലല്ല, മറിച്ച് നമ്മുടെ വ്യക്തിപരമായ തിരഞ്ഞെടുപ്പോ സ്വഭാവമോ ആണ്.' സോഷ്യല്‍ മീഡിയ പ്ലാറ്റ്‌ഫോമായ എക്‌സില്‍ പങ്കിട്ട വീഡിയയോയില്‍ സ്താനിക്‌സായി പറഞ്ഞു.

അഫ്ഗാനിസ്ഥാനില്‍ നിന്ന് വിദേശ സൈനികരെ പൂര്‍ണ്ണമായി പിന്‍വലിക്കുന്നതിലേക്ക് നയിച്ച ചര്‍ച്ചകളിലെ താലിബാന്‍ സംഘത്തിന്റെ തലവനായിരുന്നു സ്താനിക്‌സായി.

സ്ത്രീകളും പെണ്‍കുട്ടികളും വിദ്യാഭ്യാസത്തിന് അര്‍ഹരാണെന്ന് അബ്ബാസ് പറയുന്നത് ഇതാദ്യമല്ല. പെണ്‍കുട്ടികള്‍ക്ക് യൂണിവേഴ്‌സിറ്റി നിരോധനം ഏര്‍പ്പെടുത്തിയപ്പോഴും അതിനു മുമ്പും അദ്ദേഹം സമാനമായ പരാമര്‍ശങ്ങള്‍ നടത്തിയിരുന്നു.

ഒരു രാജ്യവും താലിബാനെ അഫ്ഗാനിസ്ഥാന്റെ നിയമാനുസൃത ഭരണാധികാരികളായി അംഗീകരിക്കുന്നില്ല, എങ്കിലും റഷ്യ പോലുള്ള ചില രാജ്യങ്ങള്‍ അവരുമായി ബന്ധം സ്ഥാപിച്ചിട്ടുണ്ട്. ഇന്ത്യയുമായും അഫ്ഗാന്‍ അധികൃതര്‍ നയതന്ത്രബന്ധം വികസിപ്പിച്ചുകൊണ്ടിരിക്കുകയാണ്.