ഡൽഹി: വരാനിരിക്കുന്ന ഇംഗ്ലണ്ടിനെതിരെയുള്ള പരമ്പരക്കുള്ള ഇന്ത്യൻ ടീമിൽ മുഹമ്മദ് ഷമി ഇടം നേടുമെന്ന് റിപ്പോർട്ടുകൾ. പരുക്കേറ്റ ഷമി നീണ്ട കാലത്തോളം ഇന്ത്യൻ ക്രിക്കറ്റ് ടീമിൽ നിന്നും പുറത്തായിരുന്നു. 2023 നവംബറിൽ ആണ് അവസാനമായി ഷമി ഇന്ത്യക്ക് വേണ്ടി കളിച്ചത്. എന്നാൽ പരുക്ക് വില്ലനായി എത്തിയതോടെ ഷമി ഇത്രയും കാലം ഇന്ത്യൻ ടീമിൽ നിന്നും പുറത്താവുകയായിരുന്നു. ഇപ്പോൾ താരം പരുക്കിൽ നിന്നും മുക്തി നേടിക്കൊണ്ട് ക്രിക്കറ്റിലേക്ക് വീണ്ടും തിരിച്ചെത്തിയിരിക്കുകയാണ്. 

നിലവിൽ വിജയ് ഹസാരെ ട്രോഫിയിൽ ബംഗാളിന് വേണ്ടിയാണ് ഷമി കളിക്കുന്നത്. ഈ സാഹചര്യത്തിൽ ഇംഗ്ലണ്ടിനെതിരെയുള്ള പരമ്പരക്കുള്ള ഇന്ത്യൻ ടീമിൽ ഷമിയും ഇടം നേടാൻ സാധ്യതകൾ നിലനിൽക്കുന്നുണ്ട്. നാഷണൽ ക്രിക്കറ്റ് അക്കാദമിയുടെ മെഡിക്കൽ ടീം ഷമിയുടെ ഫിറ്റ്നസിനെ നിരീക്ഷിച്ചുകൊണ്ടിരിക്കുന്നുവെന്നാണ് ലഭിക്കുന്ന വിവരങ്ങൾ. 

ഈ പരമ്പര കഴിഞ്ഞതിനു ശേഷം നടക്കുന്ന ചാമ്പ്യൻസ് ട്രോഫിയിലും ഷമി ഉണ്ടാവുമെന്നാണ് പ്രതീക്ഷിക്കുന്നത്. ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്.ചാമ്പ്യൻസ് ട്രോഫിയിൽ ഗ്രൂപ്പ് എയിൽ ആണ് ഇന്ത്യ ഉള്ളത്. ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഇന്ത്യക്കൊപ്പം ഉള്ളത്.