ലണ്ടൻ: ഇഎഫ്എൽ കപ്പിലെ ത്രില്ലർ പോരാട്ടത്തിൽ ലിവർപൂളിന് തോൽവി. ടോട്ടൻഹാം ഹോട്സ്പർ എതിരില്ലാത്ത ഒരു ഗോളിനാണ് ലിവർപൂളിനെ പരാജയപ്പെടുത്തിയത്. നീണ്ട 24 മത്സരങ്ങൾക്ക് ശേഷമാണ് ലിവർപൂൾ ഈ സീസണിൽ ഒരു ടീമിനോട് തോൽവി വഴങ്ങുന്നത്. മത്സരത്തിൽ ടോട്ടൻഹാമിനായി ലൂക്കാസ് ബെർഗ്വാർ ആണ് വിജയഗോൾ നേടിയത്. മത്സരത്തിൽ 86ാം മിനിറ്റിൽ ആയിരുന്നു താരത്തിന്റെ ഗോൾ പിറന്നത്. 

മത്സരത്തിൽ ബോൾ പൊസഷനിലും അറ്റാക്കിങ്ങിലും ലിവർപൂൾ ആയിരുന്നു മുന്നിട്ടുനിന്നിരുന്നത്. ടോട്ടൻഹാമിനെതിരെ 61 ശതമാനം ബോൾ പൊസഷൻ സ്വന്തമാക്കിയ ലിവർപൂൾ 14 ഷോട്ടുകളാണ് എതിർ പോസ്റ്റിലേക്ക് ഉതിർത്തത്. ഇതിൽ ഏഴ് ഷോട്ടുകൾ ഓൺ ടാർഗറ്റിലേക്ക് എത്തിക്കാൻ ലിവർപൂളിന് സാധിച്ചു. എന്നാൽ ഒരു ഷോട്ടുപോലും ഗോളാക്കാൻ ലിവർപൂളിന് സാധിക്കാതെ പോവുകയായിരുന്നു. 

ടോട്ടൻഹാമിന്റെ ഗോൾവലയം കാത്ത അന്റോണിൻ കിൻസ്കിയുടെ പ്രകടനവും ഏറെ ശ്രേദ്ധേയമായി. മൂന്ന് ദിവസം മുമ്പായിരുന്നു അന്റോണിൻ കിൻസ്കി ടോട്ടൻഹാമിൽ എത്തുന്നത്. തന്റെ അരങ്ങേറ്റ മത്സരത്തിൽ തന്നെ ലിവർപൂൾ പോലൊരു കരുത്തുറ്റ ടീമിന്റെ ആക്രമണങ്ങളെ തടഞ്ഞുനിർത്തികൊണ്ട് ടീമിന് ആവേശകരമായ വിജയം നൽകാൻ കിൻസ്കിക്ക് സാധിച്ചു. 

ഫെബ്രുവരി ഏഴിനാണ് ഇഎഫ്എൽ കപ്പിന്റെ സെമി ഫൈനലിലെ സെക്കൻഡ് ലെഗ് പോരാട്ടം നടക്കുന്നത്. ലിവർപൂളിന്റെ തട്ടകമായ ആൻഫീൽഡിലാണ് മത്സരം നടക്കുക.