മാഡ്രിഡ്: റയൽ മാഡ്രിഡിൻ്റെ ബ്രസീലിയൻ സൂപ്പർതാരം വിനീഷ്യസ് ജൂനിയറിന് നാല് മത്സരങ്ങളിൽ വിലക്ക് ലഭിക്കുമെന്ന് റിപ്പോർട്ടുകൾ. ലാ ലീഗയിൽ വലൻസിയക്കെതിരെയുള്ള മത്സരത്തിൽ വിനീഷ്യസിന് ചുവപ്പ് കാർഡ് ലഭിച്ചിരുന്നു. മത്സരത്തിൻ്റെ രണ്ടാം പകുതിയിൽ വലൻസിയ ഗോൾ കീപ്പർ സ്റ്റോൾ ഡിമിട്രിവ്സ്‌കിയുമായുള്ള ഏറ്റുമുട്ടലിനു പിന്നാലെയാണ് ബ്രസീലിയൻ താരത്തിന് നേരെ റഫറി ചുവപ്പ് കാർഡ് കാണിച്ചത്.

എന്നാൽ ആർ എഫ് ഇ എഫിൻ്റെ നിയമപ്രകാരം സംഭവം ആക്രമണം ആണെന്ന് മനസിലാക്കിയാൽ വിനീഷ്യസിന് നാല് മത്സരങ്ങളിൽ വിലക്ക് നേരിടേണ്ടി വന്നേക്കും. വിനിഷ്യസിൻ്റെ അഭാവം റയലിൻ്റെ മുന്നോട്ടുള്ള കുതിപ്പിന് വലിയ തിരിച്ചടിയായിരിക്കും നൽകുക.

മത്സരത്തിൽ റയൽ മാഡ്രിഡ് ഒന്നിനെതിരെ രണ്ട് ഗോളുകൾക്കാണ് വിജയിച്ചത്. മത്സരത്തിൽ ആദ്യ പകുതിയിൽ ഹ്യൂഗോ ഡ്യുറോയുടെ ഗോളിൽ മുന്നിലെത്തിയ വലൻസിയ രണ്ടാം പകുതിയിൽ റയലിൻ്റെ മുന്നിൽ തോൽവി സമ്മതിക്കുകയായിരുന്നു. മത്സരത്തിൻ്റെ അവസാന നിമിഷണങ്ങളിൽ ലൂക്ക മോഡ്രിച്ചാണ് റയലിനായി സമനില ഗോൾ നേടിയത്. ഒടുവിൽ ഇഞ്ചുറി ടൈമിൽ ജൂഡ് ബെല്ലിങ്ഹാമും ലക്ഷ്യം കണ്ടതോടെ റയൽ വിജയം സ്വന്തമാക്കുകയായിരുന്നു.

വിജയത്തോടെ സ്‌പാനിഷ് ലീഗിൽ പോയിന്റ് ടേബിളിൽ ഒന്നാമതെത്താനും റയലിന് സാധിച്ചു. 19 മത്സരങ്ങളിൽ നിന്നും 13 വിജയവും നാല് സമനിലയും രണ്ട് തോൽവിയും അടക്കം 43 പോയിൻ്റാണ് റയലിൻ്റെ കൈവശമുള്ളത്. 41 പോയിൻ്റോടെ അത്ലറ്റികോ മാഡ്രിഡ് രണ്ടാം സ്ഥാനത്തും 38 പോയിന്റുമായി ബാഴ്‌സലോണ മൂന്നാം സ്ഥാനത്തുമാണുള്ളത്.