ന്യൂഡൽഹി: ഐഎസ്എല്ലിൽ പഞ്ചാബ് എഫ്സിക്കെതിരായ മത്സരത്തിൽ കേരള ബ്ലാസ്‌റ്റേഴ്‌സിന്‌ വിജയം. ഏകപക്ഷീയമായ ഒരു ഗോളിനാണ് കേരളത്തിന്റെ വിജയം. 44-ാം മിനിറ്റിൽ മൊറോക്കൻ താരം നോഹ സദൂയിയാണു ബ്ലാസ്‌റ്റേഴ്‌സിന്റെ വിജയ​ഗോൾ നേടിയത്. അവസാനം കളിച്ച അഞ്ച് മത്സരങ്ങളിൽ നാലിലും തോറ്റ ബ്ലാസ്‌റ്റേഴ്‌സിന്‌ ഇന്നത്തെ മത്സരത്തിൽ ജയം അനിവാര്യമായിരുന്നു. 

മത്സരത്തിന്റെ 42-ാം മിനിറ്റിൽ കേരള ബ്ലാസ്‌റ്റേഴ്‌സ് താരം നോഹ സദൂയിയെ പഞ്ചാബിന്റെ സുരേഷ് മെയ്തെയ് ഫൗൾ ചെയ്തതിനാണു റഫറി പെനാൽറ്റി അനുവദിച്ചത്. കിക്കെടുത്ത നോഹ പന്ത് വലയിലെത്തിച്ചതോടെ ബ്ലാസറ്റേഴ്സ് ഒരു ഗോളിനു മുന്നിലെത്തി.

എന്നാൽ രണ്ടാം പകുതിയിൽ വലിയ പരീക്ഷണങ്ങളാണ് ബ്ലാസ്‌റ്റേഴ്‌സിനെ കാത്തിരുന്നത്. 57-ാം മിനിറ്റിൽ പഞ്ചാബിൻ്റെ മലയാളി താരം ലിയോൺ അഗസ്‌റ്റിനെ വീഴ്ത്തിയതിന് ബ്ലാസ്‌റ്റേഴ്‌സിന്റെ മിലോസ് ഡ്രിൻകിച്ച് രണ്ടാം യെല്ലോ കാർഡ് കണ്ടു പുറത്തുപോയി. അധികം വൈകാതെ മത്സരത്തിന്റെ 74-ാം മിനിറ്റിൽ ലിയോൺ അഗസ്‌റ്റിനെ അപകടകരമായ രീതിയിൽ ഫൗൾ ചെയ്തതിന് ബ്ലാസ്‌റ്റേഴ്‌സിന്റെ അയ്ബൻ ഡോലിങ്ങും ചുവപ്പു കാർഡ് കണ്ടു. 

ഇതോടെ അവസാന 15 മിനിറ്റിൽ ഒൻപതു പേരുമായി ബ്ലാസ്‌റ്റേഴ്‌സ് കളിച്ചത്. ഏഴു മിനിറ്റാണ് മത്സരത്തിന് അധിക സമയമായി റഫറി നൽകിയത്. അവസരം മുതലാക്കി സമനില പിടിക്കാൻ പരമാവധി ശ്രമിച്ച പഞ്ചാബിന് മുന്നിൽ ബ്ലാസ്‌റ്റേഴ്‌സ് പ്രതിരോധവും ഗോളി സച്ചിൻ സുരേഷും ഗോൾ വഴങ്ങാതെ പിടിച്ചുനിന്നു. 

15 മത്സരങ്ങളിൽ നിന്ന് 17 പോയിന്റുകളുമായി കേരള ബ്ലാസ്‌റ്റേഴ്സ് നിലവിൽ ഒൻപതാം സ്‌ഥാനത്താണ്. 13 കളികളിൽനിന്ന് 18 പോയിന്റുള്ള പഞ്ചാബ് എട്ടാം സ്‌ഥാനത്ത് നിൽക്കുന്നു. 13ന് കൊച്ചിയിൽ ഒഡിഷയ്ക്കെതിരെയാണ് ബ്ലാസ്‌റ്റേഴ്‌സിന്റെ അടുത്ത മത്സരം.

 The Blasters secured a thrilling victory over Punjab, showcasing their skills and determination on the field.