തിരുവനന്തപുരം: വടക്കന്‍ ജില്ലകളില്‍ ഇന്നും ശക്തമായ മഴ തുടരാന്‍ സാധ്യതയെന്ന് കാലാവസ്ഥ വകുപ്പിന്റെ മുന്നറിയിപ്പ്. കണ്ണൂരും കാസര്‍കോടും ഓറഞ്ച് അലര്‍ട്ട് പ്രഖ്യാപിച്ചിരിക്കുകയാണ്. എറണാകുളം മുതല്‍ വയനാട് വരെയുള്ള ഏഴ് ജില്ലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. മലയോരമേഖലകളില്‍ ജാഗ്രത തുടരണമെന്നും മുന്നറിയിപ്പില്‍ പറയുന്നു. 

നാല് ജില്ലകളില്‍ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചിരിക്കുകയാണ്. മലപ്പുറം,ആലപ്പുഴ,തൃശൂര്‍,കാസര്‍കോട് ജില്ലകളിലെ വിദ്യാഭ്യാസ സ്ഥാപനങ്ങള്‍ക്കാണ് അവധി. അതേസമം മുന്‍കൂട്ടി നിശ്ചയിച്ച പരീക്ഷകള്‍ക്ക് മാറ്റമില്ല. 

ദുര്‍ബലമായ ഫിന്‍ജാല്‍ ചുഴലിക്കാറ്റ് ന്യൂനമര്‍ദ്ദമായി മാറിയിരിക്കുകയാണ്. അടുത്ത മണിക്കൂറുകളില്‍ വടക്കന്‍ കേരളത്തിനും കര്‍ണാടകത്തിനും മുകളിലൂടെ അറബിക്കടലില്‍ എത്തിച്ചേരുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ അറിയിപ്പില്‍ പറയുന്നത്. കേരള തീരത്ത് മത്സ്യബന്ധനത്തിനുള്ള വിലക്ക് നീക്കിയിട്ടില്ല. 

കാസര്‍കോട് ജില്ലയില്‍ അതിശക്തമായ മഴയാണ്. ഇന്നലെ ഉച്ചമുതലാണ് ശക്തമായ മഴ തുടങ്ങിയത്.
 പലയിടത്തും വെള്ളക്കെട്ട് രൂപപ്പെട്ടു. മഞ്ചേശ്വരം പൊസോട്ട് മൂന്ന് വീടുകള്‍ വെള്ളത്തില്‍ മുങ്ങി. പാസോട്ട് മഹ്മൂദ്, ഇസ്മാഈല്‍, അബ്ദുര്‍ റഹ്മാന്‍ എന്നിവരുടെ വീടുകളാണ് വെള്ളത്തില്‍ മുങ്ങിയത്. ദേശീയപാതക്ക് സമീപത്താണ് വീടുകള്‍. ദേശീയ പാത നിര്‍മാണത്തോടെ വെള്ളം ഒഴുകിപ്പോകാനുള്ള വഴി അടഞ്ഞതാണ് സമീപത്തെ വീടുകള്‍ പകുതിയോളം വെള്ളത്തില്‍ മുങ്ങാന്‍ കാരണം. ദേശീയപാതയിലും വന്‍ വെള്ളക്കെട്ടുണ്ട്. 

കൂടാതെ കുമ്പള ഷിറിയയില്‍ ദേശീയപാതയിലും വെള്ളക്കെട്ട് രൂപപ്പെട്ടു. ഇത് വാഹന ഗതാഗത്തിന് തടസം ഉണ്ടാക്കി. വാഹനങ്ങള്‍ പകുതിയോളം മുങ്ങുന്ന രീതിയിലാണ് റോഡില്‍ വെള്ളം കയറിയത്.