പത്തനംതിട്ട: പാട്ട് ഉയർന്ന ശബ്ദത്തിൽ വെച്ചതിന് അയൽവാസിയെ വീട്ടിൽ കയറി വെട്ടി. പത്തനംതിട്ട ഇളമണ്ണൂർ സ്വദേശി കണ്ണൻ എന്നയാൾക്കാണ് വെട്ടേറ്റത്. ഇന്നലെ രാത്രിയാണ് സംഭവം. സംഭവത്തിൽ ഇളമണ്ണൂര്‍ സ്വദേശി സന്ദീപിനെ പൊലിസ് കസ്റ്റഡിയിലെടുത്തു. പരുക്കേറ്റ കണ്ണൻ ആശുപത്രിയിൽ ചികിത്സയിലാണ്.

വെട്ടേറ്റ കണ്ണനും ആക്രമിച്ച സന്ദീപും സുഹൃത്തുക്കളും അയൽവാസികളുമാണ്. കണ്ണൻ ഇന്നലെ രാത്രിയില്‍ വീട്ടില്‍ പാട്ടുവെച്ചിരുന്നു. എന്നാൽ ഉച്ചത്തിലാണ് പാട്ടുവെച്ചതെന്ന് പറഞ്ഞ് സന്ദീപ് വഴക്കിന് വരികയായിരുന്നു. ഇരുവരും തർക്കത്തിലേർപ്പെടുകയും തുടർന്ന് പ്രകോപിതനായ സന്ദീപ് കണ്ണനെ വെട്ടുകയുമായിരുന്നു.

കണ്ണന്‍റെ വീട്ടിൽ വെച്ച പാട്ടിന് ശബ്ദം കൂടിയത് ചോദ്യം ചെയ്തായിരുന്നു അക്രമമെന്ന് പൊലിസ് പറഞ്ഞു. കണ്ണന്‍റെ തലയ്ക്കും ചെവിക്കുമാണ് വെട്ടേറ്റത്. ഇയാൾ ആശുപത്രിയിൽ ചികിത്സയിലാണ്. പ്രതി സന്ദീപിനെതിരെ അടൂർ പൊലിസ് വധശ്രമത്തിന് കേസെടുത്തിട്ടുണ്ട്.