ഹോട്ടലുകളിലും റിസോര്ട്ടുകലുമെത്തുന്ന ഡ്രൈവര്മാര്ക്ക് അടിസ്ഥാന സൗകര്യങ്ങള് ഉറപ്പാക്കണം: ഉത്തരവിറക്കി ടൂറിസം വകുപ്പ്
തിരുവനന്തപുരം: ഹോട്ടലുകള്, റിസോര്ട്ടുകള്, ഹോംസ്റ്റേകള് എന്നിവിടങ്ങളിലേക്ക് വിനോദ സഞ്ചാരികളുമായി വരുന്ന ഡ്രൈവര്മാര്ക്ക് അടിസ്ഥാന സൗകര്യങ്ങള് ഉറപ്പുവരുത്താന് ആവശ്യമായ നടപടികള് സ്വീകരിക്കണമെന്ന് ടൂറിസം വകുപ്പിന്റെ ഉത്തരവ്. ഡ്രൈവര്മാര്ക്ക് ആവശ്യമായ താമസ, വിശ്രമ, ശുചിമുറി സൗകര്യങ്ങള് ഒരുക്കുന്നത് കര്ശനമായി പാലിക്കണമെന്ന് ഉത്തരവില് പറയുന്നു.
നിബന്ധന പാലിക്കുന്ന താമസ സ്ഥലങ്ങളെ ആയിരിക്കും ടൂറിസം വകുപ്പിന്റെ ക്ലാസിഫിക്കേഷനില് ഉള്പ്പെടുത്തുക. ഹോട്ടലുകള്, റിസോര്ട്ടുകള്, ഹോംസ്റ്റേകള് എന്നിവയുടെ ക്ലാസിഫിക്കേഷന് മാനദണ്ഡങ്ങളില് ഡ്രൈവര്മാര്ക്കുള്ള അടിസ്ഥാന സൗകര്യങ്ങള് ഉറപ്പുവരുത്താനുള്ള ചട്ടം ഉള്പ്പെടുത്തിക്കൊണ്ടുള്ളതാണ് ഉത്തരവ്. നിബന്ധനകള് കാര്യക്ഷമമായി പാലിക്കുന്നത് ഉള്പ്പെടെയുള്ള നടപടിക്രമങ്ങള് ടൂറിസം ഡയറക്ടര് പരിശോധിക്കും.
ടൂറിസം മേഖലയിലെ ഡ്രൈവര്മാര് നേരിടുന്ന വിവിധ പ്രശ്നങ്ങള് ചര്ച്ച ചെയ്യുന്നതിനായി തൊഴിലാളി പ്രതിനിധികളുടേയും ടൂര് ഓപ്പറേറ്റര്മാരുടെ അസോസിയേഷനുകളുടേയും യോഗം നേരത്തെ മന്ത്രി പി എ മുഹമ്മദ് റിയാസിന്റെ അധ്യക്ഷതയില് ചേര്ന്നിരുന്നു. തുടര്ന്ന് ഇക്കാര്യം ടൂറിസം വ്യവസായ പ്രതിനിധികളുമായി ചര്ച്ച ചെയ്തു. ഇതിനു ശേഷമാണ് പ്രത്യേക ഉത്തരവിറക്കിയത് . അതിഥികളുമായി വിനോദ സഞ്ചാര കേന്ദ്രങ്ങളില് എത്തുന്ന ഡ്രൈവര്മാര്ക്ക് പ്രത്യേക ഐഡി കാര്ഡുകള് നല്കാനും മേഖല തിരിച്ചുള്ള ബോധവല്ക്കരണ പരിപാടികള് സംഘടിപ്പിക്കാനും ടൂറിസം വകുപ്പ് പദ്ധതിയിടുന്നുണ്ട്.
Tourism Department Orders Basic Facilities for Drivers at Hotels and Resorts
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."