അൽകോബാർ: ടയർ പഞ്ചറായി നിർത്തിയ സ്കൂൾ ബസ് പരിശോധിക്കുന്നതിനിടയിൽ പുറകിൽ നിന്ന് മറ്റൊരു സ്കൂൾ ബസ് വന്നിടിച്ച് സ്കൂൾ ബസ് ഡ്രൈവർ മരിച്ചു. സ്കൂൾബസിലുണ്ടായിരുന്ന മൂന്ന് സ്കൂൾ വിദ്യാർഥികൾക്ക് ഗുരുതരമായ പരുക്കേറ്റു.ഞായറഴ്ച ഉച്ചക്ക് അൽ കോബാർ - ദഹ്റാൻ റോഡിൽ നെസ്റ്റോ ഹൈപ്പർ മാർക്കറ്റിന് സമീപത്താണ് വാഹനാപകടമുണ്ടായത്. ഡ്രൈവറായ ബിഹാർ സ്വദേശി സുഭാഷ് (40) ആണ് അപകടത്തിൽപ്പെട്ട മരിച്ചത്. അൽ മാജിദ് ഇൻ്റർനാഷനൽ സ്കൂളിലെ വിദ്യാർഥികളെയും അധ്യാപകരെയും ക്ലാസിനു ശേഷം കൊണ്ട് പോവുകയായിരുന്ന മിനി ബസാണ് അപകടത്തിൽപെട്ടത്. സ്കൂൾ ബസിൻ്റെ ടയർ പഞ്ചറായത് ശ്രദ്ധയിൽപ്പെട്ട സമീപത്തു കൂടെ പോയ കാറിൻ്റെ ഡ്രൈവർ അറിയിച്ച തുടർന്ന് വാഹനം നിർത്തി പുറത്തിറങ്ങി പരിശോധിക്കുന്നതിനിടയിലായിരുന്നു അപകടം സംഭവിച്ചത്. 

 ഇടിച്ചു കയറിയ ബസ് മുന്നിലെ ബസിനെ നിരക്കി നീക്കുമ്പോൾ ടയർ പരിശോധിച്ചു കൊണ്ടിരുന്ന ഡ്രൈവർ ഇതിനിടയിൽ അകപെടുകയായിരുന്നു. ഇടിയുടെ ആഘാതത്തിൽ നിയന്ത്രണം നഷ്ടപ്പെട്ട ബസിൻ്റെ മുന്നിൽ പെട്ട് കുരുങ്ങിയ ഡ്രൈവറെയും ചേർത്ത് ഞെരിച്ചമർത്തി റോഡിൻ്റെ ഡിവൈഡറിൽ ഇടിച്ചാണ് നിന്നത്. സംഭവസ്ഥലത്തു വച്ചു തന്നെ ഡ്രൈവർ മരിച്ചിരുന്നു.

 ബസിലുണ്ടായിരുന്ന കുട്ടികളിൽ മൂന്നു പേർക്കു സാരമായ പരുക്കേറ്റു. അപകടവിവരമറിഞ്ഞ് കുതിച്ചെത്തിയ റെഡ് ക്രസന്റ് ആംബുലൻസിൽ മരിച്ച സുഭാഷിൻ്റെ മൃതദേഹം ആശുപത്രിയിലേക്ക് മാറ്റുകയും, അപകടത്തിൽ ഗുരുതരപരുക്കു പറ്റിയ കുട്ടികളെ ആശുപത്രിയിൽ എത്തിക്കുകയും ചെയ്തു. ബാക്കിയുള്ള വിദ്യാർഥികളും അധ്യാപകരും പരുക്കേൽക്കാതെ രക്ഷപ്പെട്ടു. 

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക