തെല്‍ അവിവ്: പെരുന്നാള്‍ പുലരിയിലും ഗസ്സക്കുമേല്‍ തീവര്‍ഷിച്ച് ഇസ്‌റാഈല്‍. മരണംപെയ്യുന്ന നോമ്പുകാലം കടന്ന് വിശന്നൊട്ടിയെങ്കിലും സന്തോഷത്തിന്റെ പെരുന്നാളിലേക്ക് കണ്‍തുറന്ന പിഞ്ചോമനകളെ അടക്കമാണ് ഇസ്‌റാഈല്‍ നരാധമന്‍മാര്‍ കൊന്നൊടുക്കിയത്. 76 ലേറെ പേര്‍ കൊല്ലപ്പെട്ടന്നെ് മിഡില്‍ ഈസ്റ്റ് ഐ റിപ്പോര്‍ട്ട് ചെയ്യുന്നു. 

അതിനിടെ, കഴിഞ്ഞ ദിവസം ഇസ്‌റാഈല്‍ ആക്രമണത്തെ തുടര്‍ന്ന് ഗസ്സയില്‍ കാണാതായ 14 റെഡ് ക്രോസ് സിവില്‍ ഡിഫന്‍സ് ജീവനക്കാരുടെ മൃതദേഹങ്ങള്‍ കണ്ടെത്തി. നടപടി കൊടുംക്രൂരമെന്ന് ഹമാസും മനുഷ്യാവകാശ സംഘടനകളും ചൂണ്ടക്കാട്ടി.
 
നാലാഴ്ചയിലേറെയായി സമ്പൂര്‍ണ ഉപരോധമാണ് ഗസ്സയില്‍. ഭക്ഷ്യവസ്തുക്കളുടെ വിതരണം ഇസ്‌റാഈല്‍ തടഞ്ഞിരിക്കുന്നതിനാല്‍പട്ടിണിയുടെ നടുവിലാണ് ഈദുല്‍ ഫിത്ര്‍. കനത്ത ബോംബിങ് ഇടതടവില്ലാതെ തുടരുന്നതിനാല്‍ ജീവകാരുണ്യപ്രവര്‍ത്തകര്‍ക്കും സഞ്ചരിക്കാനാവാത്ത സ്ഥിതിയാണ്.

മധ്യസ്ഥ രാജ്യങ്ങളായ ഈജിപ്തും ഖത്തറും കഴിഞ്ഞയാഴ്ച മുന്നോട്ടുവച്ച പുതിയ വെടിനിര്‍ത്തല്‍ പദ്ധതി അംഗീകരിച്ചതായി ഹമാസ് അറിയിച്ചു. 50 ദിവസത്തെ വെടിനിര്‍ത്തലിന് ഹമാസ് അഞ്ച് ബന്ദികളെ മോചിപ്പിക്കണം എന്നാണ് കരാര്‍. അതേസമയം, ഈജിപ്തിന്റെ വെടിനിര്‍ത്തല്‍ നിര്‍ദേശത്തിന് ബദല്‍ സമര്‍പ്പിച്ചിരിക്കുകയാണ് ഇസ്‌റാഈല്‍. യു.എസ് പിന്തുണയോടെയാണ് ഇസ്‌റാഈല്‍ നീക്കം. 

ഇസ്‌റാഈലില്‍ നെതന്യാഹുവിനെതിരായ പ്രതിഷേധവും തുടരുകയാണ്.