അബൂദബി: ആരോഗ്യപ്രവർത്തകർക്ക് ഏത് എമിറേറ്റിലും ജോലി ചെയ്യാൻ അനുവദിക്കുന്ന പുതിയ ഏകീകൃത ലൈസൻസ് ഏർപ്പെടുത്താനൊരുങ്ങി യുഎഇ. ദേശീയ പ്ലാറ്റ്ഫോം ആരംഭിച്ചാണ് മെഡിക്കൽ പ്രഫഷനലുകൾക്ക് ഏകീകൃത ലൈസൻസ് നൽകുകയെന്ന് ആരോഗ്യ, രോഗപ്രതിരോധ മന്ത്രാലയം വ്യക്തമാക്കി. റജിസ്ട്രേഷൻ നടപടിക്രമങ്ങൾ സുതാര്യമായിരിക്കും. കൂടാതെ, ഇങ്ങനെ റജിസ്‌റ്റർ ചെയ്യുന്നവർക്ക് സർക്കാർ, സ്വകാര്യ ആരോഗ്യ കേന്ദ്രങ്ങളിൽ എവിടെയും ജോലി ചെയ്യാൻ സാധിക്കും.

ഡോക്ടർമാർ, നഴ്‌സുമാർ, ഫാർമസിസ്‌റ്റുകൾ, അനുബന്ധ മെഡിക്കൽ സ്പെഷലിസ്‌റ്റുകൾ, ആശുപത്രി- ഐടി ഉദ്യോഗസ്ഥർ എന്നിങ്ങനെ ആരോഗ്യ മേഖലയിലെ പ്രധാന തൊഴിലാളികളെയാണ് ഏകീകൃത ലൈസൻസ് ലക്ഷ്യമിടുന്നത്. യുഎഇയിലെ മുഴുവൻ ആരോഗ്യ സ്‌ഥാപനങ്ങളെയും ഇതിനു മുന്നോടിയായി ഏകീകൃത പ്ലാറ്റ്ഫോമിൽ റജിസ്‌റ്റർ ചെയ്യും. നിലവിൽ ഓരോ സ്‌ഥാപനവും സ്വന്തം നിലയ്ക്കാണ് ആരോഗ്യപ്രവർത്തകർക്ക് ലൈസൻസ് എടുത്തുവരുന്നത്.

പുതിയ സംവിധാനത്തിൽ സുതാര്യ നടപടിക്രമങ്ങളിലൂടെ പ്രവർത്തനങ്ങൾ ഏകീകരിക്കാനും ആവർത്തനം ഒഴിവാക്കാനും സാധിക്കും, കൂടാതെ, പ്ലാറ്റ്ഫോം അന്തിമ ഘട്ടത്തിലാണെന്നും ഉടൻ പ്രാവർത്തികമാക്കുമെന്നും ലൈസൻസിങ് അക്രഡിറ്റേഷൻ വകുപ്പ് ആക്ടിങ് ഡയറക്ട‌ർ അല്ല മൻസൂർ യഹ്യ പറഞ്ഞു.

ഏകീകൃത പ്ലാറ്റ്ഫോം യാഥാർഥ്യമാകുന്നതോടെ ആരോഗ്യ പ്രവർത്തകർക്ക് ലൈസൻസ് നേടുന്നതിനുള്ള സമയവും പരിശ്രമവും ഗണ്യമായി കുറക്കാനാകും. കൂടാതെ, ലൈസൻസ് ഉടമകൾക്ക് യുഎഇയിലെ സർക്കാർ, സ്വകാര്യ ആശുപത്രികളിൽ സേവനം ചെയ്യാൻ സാധിക്കുന്നത് ആരോഗ്യസേവനം കൂടുതൽ മെച്ചപ്പെടുത്താനും സഹായിക്കും.

The UAE is set to introduce a unified license for health professionals, allowing them to work across any emirate, streamlining the healthcare sector and enhancing medical services.