കുവൈത്ത് സിറ്റി: പൊതുഫണ്ട് സംരക്ഷിക്കുന്നതിനും സര്‍ക്കാര്‍ ചെലവുകള്‍ കുറയ്ക്കുന്നതിനുമുള്ള സുപ്രധാന നീക്കത്തിന്റെ ഭാഗമായി, കുവൈത്ത് കാബിനറ്റ് 11 സര്‍ക്കാര്‍ സ്ഥാപനങ്ങളോട് ജീവനക്കാര്‍ക്ക് ആരോഗ്യ ഇന്‍ഷുറന്‍സ് കരാറുകള്‍ പുതുക്കുന്നതും വാഗ്ദാനം ചെയ്യുന്നതും നിര്‍ത്താന്‍ നിര്‍ദ്ദേശിച്ചു. നിയമ വ്യവസ്ഥകള്‍ അടിസ്ഥാനമാക്കിയാണ് പുതിയ തീരുമാനം.

ഓഡിറ്റ് ബ്യൂറോ, നാഷണല്‍ അസംബ്ലിയുടെ ജനറല്‍ സെക്രട്ടേറിയറ്റ്, സെന്‍ട്രല്‍ ബാങ്ക് ഓഫ് കുവൈത്ത്, കോംപറ്റീഷന്‍ പ്രൊട്ടക്ഷന്‍ ഏജന്‍സി, ക്യാപിറ്റല്‍ മാര്‍ക്കറ്റ്‌സ് അതോറിറ്റി, കമ്മ്യൂണിക്കേഷന്‍സ് ആന്‍ഡ് ഇന്‍ഫര്‍മേഷന്‍ ടെക്‌നോളജി റെഗുലേറ്ററി അതോറിറ്റി, പബ്ലിക് ഇന്‍സ്റ്റിറ്ഷന്‍ ഫോര്‍ സോഷ്യല്‍ എന്നിവയുള്‍പ്പെടെ നിരവധി പ്രമുഖ സര്‍ക്കാര്‍ സ്ഥാപനങ്ങളില്‍ ജോലി ചെയ്യുന്നവരെ പുതിയ നിര്‍ദ്ദേശം പ്രതികൂലമായി ബാധിക്കും. 

ധനമന്ത്രാലയത്തിന്റെ നിരീക്ഷണ പ്രകാരം നിരവധി സ്ഥാപനങ്ങള്‍ അവരുടെ ജീവനക്കാര്‍ക്ക് സ്വതന്ത്രമായി ആരോഗ്യ ഇന്‍ഷുറന്‍സ് ആനുകൂല്യങ്ങള്‍ വാഗ്ദാനം ചെയ്തിട്ടുണ്ടെന്നും പലപ്പോഴും ഈ ആനുകൂല്യങ്ങള്‍ ലൈഫ് ഇന്‍ഷുറന്‍സും ജീവനക്കാരുടെ കുടുംബങ്ങള്‍ക്കുള്ള കവറേജും ഉള്‍പ്പെടുത്തി വിപുലീകരിക്കുന്നുണ്ടെന്നും ധനമന്ത്രാലയം വെളിപ്പെടുത്തി. ഈ ചെലവുകള്‍ അസ്വീകാര്യമായ തലത്തിലേക്ക് വര്‍ധിച്ചതായി മന്ത്രാലയം ചൂണ്ടിക്കാട്ടി. 

കുവൈത്ത് പെട്രോളിയം കോര്‍പ്പറേഷനും അതിന്റെ അനുബന്ധ സ്ഥാപനങ്ങളും ആരോഗ്യ ഇന്‍ഷുറന്‍സ് വാഗ്ദാനം ചെയ്യുന്നത് പോലെയുള്ള ആരോഗ്യ സംരക്ഷണ വ്യവസ്ഥകളിലെ ഇരട്ടത്താപ്പ് മന്ത്രാലയം എടുത്തുകാട്ടി. 

2014ലെ 51ാം നമ്പര്‍ കാബിനറ്റ് പ്രമേയത്തിലും 2020ലെ നമ്പര്‍ 728ലും പൊതുചെലവ് കുറയ്ക്കുന്നതിനുള്ള വിപുലമായ ശ്രമങ്ങളുടെ ഭാഗമാണ് കാബിനറ്റിന്റെ നിര്‍ദ്ദേശം. ഈ പ്രമേയങ്ങള്‍ ചെലവുകള്‍ നിയന്ത്രിക്കുന്നതിനും വരുമാന സ്രോതസ്സുകള്‍ വൈവിധ്യവത്കരിക്കുന്നതിനും സാമ്പത്തിക അസന്തുലിതാവസ്ഥ പരിഹരിക്കുന്നതിനും ഊന്നല്‍ നല്‍കും. ഇളവ് ആവശ്യമായ ഏതെങ്കിലും കേസുകള്‍ സമര്‍പ്പിക്കാന്‍ ബാധിത സ്ഥാപനങ്ങളോട് കാബിനറ്റ് അഭ്യര്‍ത്ഥിച്ചു. ധനമന്ത്രാലയം ഈ കേസുകള്‍ വിലയിരുത്തുകയും അതിന്റെ ശുപാര്‍ശകള്‍ മന്ത്രിസഭയില്‍ അവതരിപ്പിക്കുകയും ചെയ്യും.

നിലവിലുള്ള നിയന്ത്രണങ്ങളും സംവിധാനങ്ങളും പാലിച്ച് ആരോഗ്യ മന്ത്രാലയത്തിന്റെ സൗകര്യങ്ങള്‍ മുഖേന ആരോഗ്യ സംരക്ഷണ സേവനങ്ങള്‍ നല്‍കും. ഈ മാറ്റം ജീവനക്കാര്‍ക്ക് നല്‍കുന്ന പരിചരണത്തിന്റെ ഗുണനിലവാരത്തില്‍ വിട്ടുവീഴ്ച ചെയ്യില്ലെന്ന് മന്ത്രാലയം ഉറപ്പ് നല്‍കി. കൂടാതെ, കുവൈത്ത് പെട്രോളിയം കോര്‍പ്പറേഷന്റെ ഇന്‍ഷുറന്‍സ് പോളിസികളില്‍ ഭേദഗതി വരുത്താന്‍ ധനമന്ത്രാലയം ആവശ്യപ്പെടുകയും ജീവനക്കാരുടെ ആരോഗ്യ സംരക്ഷണ ആവശ്യങ്ങള്‍ നിറവേറ്റുന്നതിനായി അല്‍അഹമ്മദി ഹോസ്പിറ്റലിനൊപ്പം ആരോഗ്യ മന്ത്രാലയത്തിന്റെ സൗകര്യങ്ങള്‍ ഉപയോഗപ്പെടുത്താന്‍ കമ്പനിയോട് ആവശ്യപ്പെടുകയും ചെയ്തു.

ബാധിത സ്ഥാപനങ്ങളുടെ പട്ടിക

Audit Bureau 
General Secretariat of the National Assembly 
Cetnral Bank of Kuwait 
Monopoly Protection Agency 
Capital Markets Authortiy 
Communications and Information Technology Regulatory Authortiy Public Institution for Social Securtiy 
Kuwait Ports Authortiy 
Kuwait Fund for Arab Economic Development 
Kuwait News Agency (KUNA) 
Insurance Regulatory Unit