ഡൽഹി: അടുത്തിടെ അവസാനിച്ച ബോർഡർ ഗവാസ്കർ ട്രോഫിയിലെ മോശം പ്രകടനങ്ങൾക്ക് പിന്നാലെ ഇന്ത്യൻ നായകൻ രോഹിത് ശർമ്മ വിരാട് കോഹ്‌ലി എന്നിവരുടെ വിരമിക്കലിനെക്കുറിച്ച് ധാരാളം ചർച്ചകൾ നിലനിന്നിരുന്നു. ഇപ്പോൾ ഈ വിഷയത്തെക്കുറിച്ച് അഭിപ്രായം പറയുകയാണ് മുൻ ഇന്ത്യൻ താരം കപിൽ ദേവ്. താൻ പ്രസിഡൻ്റായി സേവനമനുഷ്ഠിക്കുന്ന പ്രൊഫഷണൽ ഗോൾഫ് ടൂർ ഓഫ് ഇന്ത്യ സംഘടിപ്പിച്ച ഒരു പരിപാടിയിൽ സംസാരിക്കുകയായിരുന്നു കപിൽ ദേവ്. 

'സെലക്ടർമാർ ഇതിനെക്കുറിച്ച് ചിന്തിച്ചിട്ടുണ്ടാകുമെന്നാണ് ഞാൻ കരുതുന്നത്. അതുകൊണ്ട് ഞാൻ ഇപ്പോൾ എന്തെങ്കിലും പറഞ്ഞാൽ അവരെ വിമർശിക്കുകയാണെന്ന് എല്ലാവരും കരുതും. അവരെ വിമർശിക്കാൻ ഞാൻ ആഗ്രഹിക്കുന്നില്ല. അവർ ഈ കാര്യങ്ങൾ വളരെ നാണായി ആസൂത്രണം ചെയ്യുകയും ചിന്തിക്കുകയും ചെയ്യുന്നുണ്ടാവും. അവർ വലിയ കളിക്കാരാണ്. കളിക്കാൻ പറ്റിയ സമയം അല്ലെന്ന് തോന്നുമ്പോൾ അവർ സ്വയം വിരമിക്കും,' കപിൽ ദേവ് പറഞ്ഞു. 

ഇംഗ്ലണ്ടിനെതിരെയുള്ള പരമ്പരയാണ് ഇനി ഇന്ത്യയുടെ മുന്നിലുള്ളത്. അഞ്ചു ട്വന്റി ട്വന്റിയും മൂന്ന് ഏകദിനവും ആണ് പരമ്പരയിൽ ഉള്ളത് ജനുവരി 22 മുതൽ ഫെബ്രുവരി രണ്ട് വരെയാണ് ട്വന്റി ട്വന്റി പരമ്പര നടക്കുക. ഇതിനു ശേഷം ഫെബ്രുവരി ആറ് മുതൽ 12 വരെ മൂന്ന് ഏകദിന മത്സരങ്ങളും നടക്കും.