ഇറ്റലി: സിരി എയിൽ നടന്ന ടോറിനോ എഫ്സിക്കെതിരായ അവസാന മത്സരത്തിൽ യുവന്റസ് സമനില നേടിയിരുന്നു. മത്സരത്തിൽ ഇരു ടീമുകളും ഓരോ ഗോൾ വീതം നേടി കൊണ്ട് പോയിന്റുകൾ പങ്കുവെക്കുകയായിരുന്നു. മത്സരം തുടങ്ങി എട്ടാം മിനിറ്റിൽ തന്നെ കെനാൻ യിൽഡിസിന്റെ ഗോളിലൂടെ യുവന്റസ് ആയിരുന്നു ആദ്യം ലീഡ് നേടിയത്. എന്നാൽ മത്സരത്തിന്റെ ആദ്യ പകുതിയിലെ ഇഞ്ചുറി ടൈമിൽ നിക്കോളാ വ്ലാസിക്കിലൂടെ ടോറിനോ മറുപടി നേടുകയായിരുന്നു. 

യുവന്റസിനായി ഗോൾ നേടിയതിനു പിന്നാലെ സൂപ്പർതാരം ക്രിസ്റ്റ്യാനോ റൊണാൾഡോയുടെ ഒരു നേട്ടത്തിനൊപ്പം ആണ് കെനാൻ യിൽഡിസ്  എത്തിയത്. റൊണാൾഡോക്ക് ശേഷം സീരി എയിൽ ടോറിനോക്കെതിരെ എവേ, ഹോം മത്സരങ്ങളിലും ഗോൾ നേടുന്ന താരമായാണ് കെനാൻ മാറിയത്. 

കഴിഞ്ഞവർഷം നവംബറിൽ നടന്ന മത്സരത്തിൽ എതിരില്ലാത്ത രണ്ടു ഗോളുകൾക്ക് യുവന്റസ് ടോറിനോയെ പരാജയപ്പെടുത്തിയിരുന്നു. ഈ മത്സരത്തിലും കെനാൻ ഗോൾ നേടിയിരുന്നു. 2018-19 സീസണിൽ ആയിരുന്നു റൊണാൾഡോ ടോറിനോക്കെതിരെ എവേ മത്സരത്തിലും ഹോം മത്സരത്തിലും ഗോൾ നേടിയത്. 

നിലവിൽ ഈ സീസണിൽ സീരി എയിൽ അഞ്ചാം സ്ഥാനത്താണ് യുവന്റസ് ഉള്ളത്. 19 മത്സരങ്ങളിൽ നിന്നും ഏഴ് വിജയവും 12 സമനിലയുമായി 33 പോയിന്റാണ് യുവന്റസിന്റെ കൈവശമുള്ളത്.