കുവൈത്ത് സിറ്റി: കുവൈത്തില്‍ ജനുവരി അഞ്ചു മുതല്‍ വിസ നിയമലംഘനങ്ങള്‍ക്കുള്ള പുതിയ പിഴകള്‍ പ്രാബല്യത്തില്‍ വരും. താമസ നിയമലംഘകര്‍, നിയമവിരുദ്ധമായി രാജ്യത്ത് തങ്ങുന്നവര്‍ എന്നിവരുടെ മേല്‍ കനത്ത പിഴകള്‍ ചുമത്തും. സന്ദര്‍ശക വിസയിലെത്തി താമസ കാലാവധി കഴിഞ്ഞിട്ടും രാജ്യത്തു തുടര്‍ന്നാല്‍ ഓരോ ദിവസവും പത്തു ദീനാര്‍ ഈടാക്കും. ഇത്തരക്കാര്‍ക്കുള്ള കൂടിയ പിഴ രണ്ടായിരം കുവൈത്തി ദീനാറാണ്. 

ഗ്രേസ് പിരിയഡിന് ശേഷവും നവജാതശിശുക്കളെ രജിസ്റ്റര്‍ ചെയ്യാത്തവര്‍ക്ക് ആദ്യ മാസം പ്രതിദിനം രണ്ടു ദീനാറും തുടര്‍ന്നുള്ള മാസങ്ങളില്‍ നാലു ദീനാര്‍ വീതവും പിഴ ചുമത്തും. ഇതിനുള്ള പരമാവധി പിഴയും രണ്ടായിരം കുവൈത്തി ദീനാറാണ്. തൊഴില്‍ വിസ ലംഘനങ്ങള്‍ക്ക് ഗ്രേസ് പീരിയഡിന് ശേഷം ആദ്യ മാസം രണ്ടു ദീനാറും തുടര്‍ന്നുള്ള മാസങ്ങളില്‍ നാലു ദീനാറും ചുമത്തും. ഇതിനുള്ള പരമാവധി പിഴ ആയിരത്തി ഇരുനൂറു ദീനാറാണ്.

Kuwait: New fines for visa violations effective today; A fine of 10 dinars per day will be charged after the visitor visa expires