ജംഷഡ്‌പുർ: പരിശീലകനെ മാറ്റിയതിനു പിന്നാലെ നടന്ന ആദ്യ മത്സരത്തിൽ അവസാന സ്‌ഥാനക്കാരായ മുഹമ്മൻസ് സ്പോർട്ടിങ്ങിനോട് വമ്പ് കാട്ടിയങ്കിലും, കുറച്ചുകൂടി ശക്തരായ  എതിരാളികളായി വന്നപ്പോൾ കേരള ബ്ലാസ്‌റ്റേഴ്‌സ് വീണ്ടും 'പഴയ' ബ്ലാസ്‌റ്റേഴ്‌സായി. ഫലം, ജംഷഡ്‌പുർ എഫ്സിയുടെ തട്ടകത്തിൽ നടന്ന ഐഎസ്എൽ പോരാട്ടത്തിൽ കേരളത്തിന് തോൽവി.

ബ്ലാസ്‌റ്റേഴ്‌സ് താരങ്ങൾ അവസരങ്ങൾ പാഴാക്കുന്നതിൽ 'മത്സരിച്ച' കളിയിൽ, ഏകപക്ഷീയമായ ഒരു ഗോളിനാണ് ജംഷഡ്‌പുരിന്റെ വിജയം പിടിച്ചെടുത്തത്. 61-ാം മിനിറ്റിൽ പ്രതീക് ചൗധരിയാണ് ജംഷഡ്‌പുരിന്റെ വിജയഗോൾ കണ്ടെത്തിയത്.

സീസണിലെ ഏഴാം ജയം കുറിച്ച ജംഷഡ്‌പുർ എഫ്‌സി 12 കളികളിൽനിന്ന് 21 പോയിന്റുമായി നാലാം സ്‌ഥാനത്തേക്കു കുതിച്ചു. സീസണിലെ എട്ടാം തോൽവി വഴങ്ങി കേരള ബ്ലാസ്‌റ്റേഴ്സ് ആകട്ടെ, 14 കളികളിൽനിന്ന് നാലു ജയവും 2 സമനിലയും വഴി നേടിയ 14 പോയിന്റുമായി 10-ാം സ്‌ഥാനത്താണ്.