ഗസ്സ: ആശുപത്രി, അഭയാര്‍ഥി ക്യാംപുകള്‍ വ്യത്യാസമില്ലാതെ ഫലസ്തീനില്‍ ആക്രമണം കൂട്ടക്കൊല തുടര്‍ന്ന് ഇസ്‌റാഈല്‍. 24 മണിക്കൂറിനിടെ 50 ലേറെ പേരെയാണ് സയണിസ്റ്റുകള്‍ മിസൈല്‍ വര്‍ഷിച്ച് കൊലപ്പെടുത്തിയത്. വടക്കന്‍ ഗസ്സയിലെ കമല്‍ അദുവാന്‍ ആശുപത്രിക്ക് സമീപത്ത് നടത്തിയ ആക്രമണത്തിലാണ് ഇത്രയും പേര്‍ കൊല്ലപ്പെട്ടത്. പരുക്കേറ്റവരെ ഗസ്സയിലെ അല്‍ അദുവ ആശുപത്രിയിലാണ് പ്രവേശിപ്പിച്ചത്. തുടര്‍ച്ചയായ ഇസ്‌റാഈല്‍ ആക്രമണംമൂലം രോഗിപരിചരണ സംവിധാനം ഏറെക്കുറേ താറുമാറായ ആശുപത്രിയാണിത്. 

ആശുപത്രിയിലെ അഞ്ചു ആരോഗ്യപ്രവര്‍ത്തകരും കൊല്ലപ്പെട്ടവരില്‍ ഉള്‍പ്പെടും. ശിശുരോഗവിദഗ്ധന്‍ ഡോ.അഹമ്മദ് സമൂറും കൊല്ലപ്പെട്ടിട്ടുണ്ട്. 2023 ഒക്ടോബര്‍ ഏഴിന് തുടങ്ങിയ ആക്രമണത്തില്‍ ഇതുവരെ 45,399 ഫലസ്തീനികളാണ് കൊല്ലപ്പെട്ടത്. ഇതില്‍ 17,492 കുട്ടികളാണ്. കെട്ടിടാവശിഷ്ടങ്ങള്‍ക്കിടയില്‍ കുടുങ്ങിക്കിടക്കുന്ന ആയിരക്കിന് പേരെ കൂടി ഉള്‍പ്പെടുത്തുന്നതോടെ മരണസംഖ്യ ഇനിയും കൂടും. ഇത്തരത്തില്‍ 11,160 പേരെയാണ് കാണാതായത്. 107,940 പേര്‍ക്ക് പരുക്കേറ്റു.

 

courtesy Al Jazeera

ഇതോടൊപ്പം ഇസ്‌റാഈല്‍ വെസ്റ്റ്ബാങ്കില്‍ കൂട്ട അറസ്റ്റും തുടരുകയാണ്. ഇന്നലെ ഖാസിം മുഹമ്മദ് ബദിര്‍ എന്ന യുവാവിനെ പിടികൂടി കൊണ്ടുപോയി. ആക്രമണം തുടങ്ങിയ ശേഷം 15,000 ലേറെ ഫലസ്തീനികളെയാണ് അധിനിവേശ സൈന്യം ഇത്തരത്തില്‍ നിയമവിരുദ്ധമായി പിടികൂടിയത്.

ഗസ്സക്കൊപ്പം സിറിയയിലും യമനിലും ഇസ്‌റാഈല്‍ ആക്രമണം നടത്തിവരികയാണ്. യമനിലെ തലസ്ഥാനമായ സന്‍ആയിലാണ് ഇസ്‌റാഈല്‍ വ്യോമാക്രമണം നടത്തിയത്. യമന്‍ സന്ദര്‍ശിച്ച യു.എന്നിന്റെ ആരോഗ്യവിഭാഗമായ ഡബ്യു.എച്ച്.ഒ മേധാവി മടങ്ങാനായി വിമാനത്താവളത്തില്‍നില്‍ക്കെയായിരുന്നു ആക്രമണം. യമനില്‍ നടത്തിയ ആക്രമണത്തില്‍ ആറുപേര്‍ കൊല്ലപ്പെട്ടു. യമനില്‍നിന്നുള്ള മിസൈലുകള്‍ തടഞ്ഞതായി ഇസ്‌റാഈല്‍ അറിയിച്ചു.

ഇന്നലെ അഞ്ചു മാധ്യമപ്രവര്‍ത്തകരെ ഇസ്‌റാഈല്‍ കൊലപ്പെടുത്തിയിരുന്നു. ഗസ്സസിറ്റിയിലെ സൈത്തൂന്‍ പ്രദേശത്തെ വീടിന് നേര്‍ക്ക് ആക്രമണം നടത്തിയാണ് ജൂത സൈന്യം മാധ്യമപ്രവര്‍ത്തകരെ വകവരുത്തിയത്. കൊല്ലപ്പെട്ടവരെല്ലാം അല്‍ ഖുദ്‌സ്, അല്‍ യൗം ടെലിവിഷന്‍ ചാനലിന് വേണ്ടി പ്രവര്‍ത്തിക്കുന്നവരാണ്.

ഗസ്സയില്‍ നടത്തിയ മറ്റൊരു ആക്രമണത്തില്‍ അഞ്ചുകുട്ടികളും കൊല്ലപ്പെട്ടു. ഇസ്‌റാഈല്‍ ഫലസ്തീന്‍ കുട്ടികളെ മനപ്പൂര്‍വം ലക്ഷ്യംവയ്ക്കുകയാണെന്ന് ഫലസ്തീന്‍ സംഘടനകള്‍ ആരോപിക്കുന്നതിനിടെയാണ് കുട്ടികള്‍ക്ക് നേരെയുള്ള ആക്രമണവിവരം പുറത്തുവന്നത്. കുട്ടികളെ കൊല്ലുന്നത് ഒരു കാരണവശാലും ന്യായീകരിക്കാനാവില്ലെന്നും വിദ്യാഭ്യാസവും സാധാരണ ജീവിതവുമെല്ലാം നഷ്ടപ്പെട്ട് തകര്‍ന്ന അവശിഷ്ടങ്ങള്‍ക്കിടയില്‍ ജീവിക്കുകയാണ് ഗസ്സയിലെ കുട്ടികളെന്നും ഏജന്‍സി പറഞ്ഞു.

Israel War on Gaza Bomb blast near  gaza hospital over 50 dead