ബംഗളുരു: ഡിജിറ്റല്‍ അറസ്റ്റ് തട്ടിപ്പില്‍ ബംഗളുരുവിലെ സോഫ്റ്റ് വെയര്‍ എന്‍ജിനീയര്‍ക്ക് നഷ്ടമായത് 11.8 കോടി രൂപ. കള്ളപ്പണം വെളുപ്പിക്കുന്നതിന് ബാങ്ക് അക്കൗണ്ട് തുറക്കാന്‍ ആധാര്‍ കാര്‍ഡ് ഉപയോഗിച്ചെന്ന് കണ്ടെത്തിയെന്ന് പറഞ്ഞാണ് 39 വയസുകാരനായ എന്‍ജിനീയറെ തട്ടിപ്പിനിരയാക്കിയത്. 

ടെലികോം റഗുലേറ്ററി അതോറിറ്റി ഓഫ് ഇന്ത്യയുടെ ഉദ്യോഗസ്ഥനെന്ന് പറഞ്ഞാണ് തട്ടിപ്പുകാര്‍ യുവാവിനെ വിളിച്ചത്. നവംബര്‍ 25 നും ഡിസംബര്‍ 12 നും ഇടയിലാണ് തട്ടിപ്പ് നടന്നത്. 

ആധാര്‍ കാര്‍ഡുമായി ബന്ധിപ്പിച്ച തന്റെ സിം കാര്‍ഡ് നിയമവിരുദ്ധമായ പരസ്യങ്ങള്‍ക്കും ശല്യപ്പെടുത്തുന്ന സന്ദേശങ്ങള്‍ക്കും ഉപയോഗിച്ചതായി വിളിച്ചയാള്‍ പറഞ്ഞു. ഇതുമായി ബന്ധപ്പെട്ട് മുംബൈ കൊളാമ്പ സൈബര്‍ പൊലിസ് കേസെടുത്തിട്ടുണ്ടെന്നും ഇയാള്‍ അറിയിച്ചു. തുടര്‍ന്ന് പൊലിസ് സ്റ്റേഷനില്‍ നിന്നാണെന്ന് പറഞ്ഞ് മറ്റൊരു കോളുമെത്തി. ഇക്കാര്യം രഹസ്യമാക്കി വെക്കണമെന്നും വെര്‍ച്വല്‍ അന്വേഷണത്തോട് സഹകരിച്ചില്ലെങ്കില്‍ നേരിട്ടെത്തി അറസ്റ്റ് ചെയ്യുമെന്നും ഇവര്‍ ഭീഷണിപ്പെടുത്തി. 

തുടര്‍ന്ന് വീഡിയോ കോള്‍ ചെയ്യാനായി ഒരു ആപ്പ് ഡൗണ്‍ലോഡ് ചെയ്യാനും ആവശ്യപ്പെട്ടു. മുംബൈ പൊലിസ് യൂണിഫോം ധരിച്ച ഒരാള്‍ വീഡിയോയില്‍ വിളിച്ച് ഒരു വ്യവസായി തന്റെ ആധാര്‍ ഉപയോഗിച്ച് ബാങ്ക് അക്കൗണ്ട് തുറന്ന് 6 കോടി രൂപയുടെ ഇടപാടുകള്‍ നടത്തിയെന്നും പറഞ്ഞു. പിന്നീട് നവംബര്‍ 25ന് വെരിഫിക്കേഷന്‍ നടപടികള്‍ക്കുവേണ്ടിയെന്നു പറഞ്ഞ് ഏതാനും അക്കൗണ്ടുകളിലേക്ക് പണം കൈമാറാന്‍ ആവശ്യപ്പെട്ടു. പലതവണയായി 11.8 കോടി രൂപ എന്‍ജിനീയര്‍ തട്ടിപ്പുകാര്‍ക്ക് കൈമാറി. എന്നാല്‍ വീണ്ടും പണം ആവശ്യപ്പെട്ടതോടെയാണ് ഇദ്ദേഹം പൊലിസില്‍ വിവരമറിയിച്ചത്.