കണ്ണൂര്‍: നിരത്തിലെ കുരുതിക്കു തടയിടാന്‍ കര്‍ശന നടപടികളുമായി സര്‍ക്കാര്‍ മുന്നോട്ടുപോകുന്നതിനിടെ കട്ടപ്പുറത്തായ സ്‌കൂള്‍ബസുകള്‍ക്ക് ഫിറ്റ്‌നസ് സര്‍ട്ടിഫിക്കറ്റ് വേണ്ടന്ന വിചിത്ര ഉത്തരവുമായി മോട്ടോര്‍ വാഹനവകുപ്പ്. സ്വകാര്യബസുകളുടെ മത്സരയോട്ടത്തിനിടെയുണ്ടാകുന്ന അപകടങ്ങളില്‍ മരണം സംഭവിച്ചാല്‍ പെര്‍മിറ്റ് റദ്ദാക്കുന്നതുള്‍പ്പെടെ കടുത്ത നടപടികള്‍ കൈക്കൊള്ളുമ്പോഴാണ് കാലാവധി കഴിഞ്ഞ ബസുകള്‍ നിരത്തിലിറക്കാന്‍ പച്ചക്കൊടി കാട്ടിയത്. 

ഫിറ്റ്‌നസ് തീര്‍ന്ന് കട്ടപ്പുറത്തായ സ്‌കൂള്‍ ബസുകള്‍ക്കും വരും മാസങ്ങളില്‍ ഫിറ്റ്‌നസ് തീരുന്ന ബസുകള്‍ക്കുമാണ് 2025 ഏപ്രില്‍ വരെ ഫിറ്റ്‌നസ് നീട്ടി നല്‍കിയത്. അടുത്ത ഏപ്രില്‍, മേയ് മാസങ്ങളില്‍ ഫിറ്റ്‌നസ് പരിശോധന നടത്തിയാല്‍ മതിയെന്നാണ്  ഇന്നലെ ഗതാഗതവകുപ്പ് കമ്മിഷണര്‍ എച്ച്.നാഗരാജു ഇറക്കിയ ഉത്തരവില്‍ പറയുന്നത്. ഒട്ടേറെ സ്‌കൂള്‍ബസുകളുടെ കാലാവധി 15വര്‍ഷത്തിന് മുകളിലാണ്. 

സ്‌കൂള്‍വിദ്യാര്‍ഥികള്‍ക്ക് സുരക്ഷിതയാത്രയൊരുക്കണമെന്ന് നീതിപീഠങ്ങള്‍ നിരന്തരം ഓര്‍മിപ്പിക്കുമ്പോഴാണ് സഞ്ചാരയോഗ്യമല്ലാത്ത സ്‌കൂള്‍ബസുകള്‍ നിരത്തിലിറക്കാന്‍ കണ്ണുംപൂട്ടി സമ്മതം കൊടുക്കുന്നത്. മണ്ഡലകാലത്ത് ശബരിമലയിലേക്ക് സര്‍വിസ് നടത്തുന്ന കെ.എസ്.ആര്‍.ടി.സി ബസുകളുടെ ഫിറ്റ്‌നസ് ഉറപ്പാക്കണമെന്ന് കഴിഞ്ഞ മാസമാണ് ഹൈക്കോടതി ഉത്തരവിട്ടത്. 

ഈ ജാഗ്രതപോലും ഗതാഗതവുകപ്പിനില്ലെന്ന് ഇന്നലത്തെ വിചിത്ര ഉത്തരവ് സാക്ഷ്യപ്പെടുത്തുന്നു. സ്‌കൂള്‍ കുട്ടികളുടെ ജീവന് പുല്ലുവില നല്‍കിയുള്ള ഉത്തരവില്‍ പകയ്ക്കുകയാണ് രക്ഷിതാക്കളും അധ്യാപകരും. ഫിറ്റ്‌നസ് സര്‍ട്ടിഫിക്കറ്റ് ഇല്ലാത്തതിനാല്‍ നരവിധി സ്‌കൂള്‍ ബസുകള്‍ കട്ടപ്പുറത്താണ്. ഈ വാഹനങ്ങള്‍ക്കും ഫിറ്റ്‌നസില്ലാതെ ഓടാമെന്നാണ് പുതിയ ഉത്തരവില്‍ പറയുന്നത്.