കൊച്ചി: സംസ്ഥാന സ്‌കൂൾ കായിക മേളയുടെ സമാപന ദിവസം അധ്യാപകർക്കായി നടത്തിയ മത്സരങ്ങളിൽ താരമായി ഈവ ടീച്ചർ. പത്തനംതിട്ട ചെങ്ങരൂർ സെന്റ് തെരേസാസ് ബെതനി കോൺവെന്റ് ഹയർസെക്കൻഡറി സ്‌കൂൾ കായികാധ്യാപികയായ ഈവ സാറ ജേക്കബ് രണ്ട് സ്വർണം നേടിയാണ്  താരമായത്. കുട്ടികൾ മത്സരിക്കുന്നതുകണ്ട് ആവേശത്തിൽ ട്രാക്കിലിറങ്ങിയതാണെന്നും സ്വർണമെഡലുകൾ കിട്ടിയതിൽ സന്തോഷമുണ്ടെന്നും ഈവ ടീച്ചർ പറഞ്ഞു. 

വനിതാ അധ്യാപകരുടെ 30 വയസിന് താഴെയുള്ളവരുടെ വിഭാഗത്തിൽ  100 മീറ്ററിലും  ഷോട്ട്പുട്ടിലുമാണ് ടീച്ചർ സ്വർണം നേടിയത്. 6.81 മീറ്റർ എറിഞ്ഞായിരുന്നു ഷോട്ട് പുട്ടിൽ സ്വർണം. വിദ്യാർഥികളെയും കൊണ്ട് മത്സരിക്കാൻ എത്തിയിട്ടുണ്ടെങ്കിലും ആദ്യമായാണ് ടീച്ചർ മത്സരിക്കാൻ ഇറങ്ങിയത്. പഠനകാലത്ത് ജൂഡോ, വോളിബോൾ, റസ്ലിങ് തുടങ്ങിയ മത്സരങ്ങളിൽ മത്സരിച്ചിട്ടുണ്ട്.

കായികാധ്യാപകരായ മാതാപിതാക്കളുടെ പാത പിന്തുടർന്നാണ് കായിക മേഖലയിലേക്ക് എത്തുന്നത്. അധ്യാപകനായ സിജോ എൻ. രാജുവാണ് ഭർത്താവ്. മകൾ എലോറ സിജോ. വനിതാ അധ്യാപകരുടെ 30 വയസിന് താഴെയുള്ളവരുടെ വിഭാഗത്തിൽ  100 മീറ്ററിൽ വാരാംപറ്റ ജി.എച്ച്. എസിലെ സയൻസ് അധ്യാപികയായ ജയസുധയ്ക്കാണ് വെള്ളി. കൂത്തുപറമ്പ് യു.പി സ്‌കൂളിലെ അധ്യാപിക അനാമിക വെങ്കലം നേടി.