കൊച്ചി: സീനിയർ പെൺകുട്ടികളുടെ ട്രിപ്പിൾ ജംപ് ജേതാവ് ഏയ്ഞ്ചൽ ജെയിംസിന് മത്സരിക്കേണ്ടിവന്നത് മറ്റ് കുട്ടികളോട് മാത്രമായിരുന്നില്ല തനിക്കൊപ്പം കൂടിയ പനിക്കെതിരേ കൂടിയായിരുന്നു. പനിയും ജലദോഷവുമായാണ് മലപ്പുറം ഐഡിയൽ ഇ.എം. എച്ച്.എസ് എസ് കടകശേരിയുടെ ഏയ്ഞ്ചൽ മത്സരത്തിനിറങ്ങിയത്.

മത്സരം കഴിഞ്ഞപ്പോൾ 11.56 മീറ്റർ ദൂരം പിന്നിട്ട് സ്വർണം തന്റെ കൈക്കുള്ളിലാക്കി ഈ മിടുക്കി. സീനിയർ പെൺകുട്ടികളുടെ 100 മീറ്റർ ഹർഡിൽസ്, ഹൈ ജംപ് ഇനങ്ങളിൽ വെള്ളിയും ഏയ്ഞ്ചൽ നേടിയിരുന്നു. കൊച്ചിയിൽ എത്തിയ ദിവസം മുതൽ പനിയും ജലദോഷവുമായിരുന്നു. ഇതുവച്ചാണ് ആദ്യ റൗണ്ട് മത്സരങ്ങളിലും ഇറങ്ങിയതെന്ന് ഏയ്ഞ്ചൽ പറഞ്ഞു. സൈക്ലിങ് താരമായിരുന്ന ഏയ്ഞ്ചൽ കോഴിക്കോട് പുല്ലൂരാംപാറ സ്‌കൂളിലെത്തിയതോടെയാണ് അത്‌ലറ്റിക്‌സിലേക്ക് ശ്രദ്ധതിരിച്ചത്.

തിരുവനന്തപുരം സ്‌പോർട്‌സ് സ്‌കൂളിൽ എത്തിയതോടെ ചാട്ടത്തിൽ ശ്രദ്ധ കേന്ദ്രീകരിച്ചു. കഴിഞ്ഞ വർഷമാണ് ഐഡിയലിലെത്തിയത്. ജൂനിയർ വിഭാഗം ഹെപ്റ്റാത്തണിൽ നാഷനൽ, സൗത്ത് സോൺ മീറ്റുകളിൽ സ്വർണം നേടിയ ഏയ്ഞ്ചൽ കഴിഞ്ഞ കായിക മേളയിൽ ട്രിപ്പിൾ ജംപിൽ വെങ്കലവും 100 മീറ്റർ ഹർഡിൽസിൽ വെള്ളിയും നേടിയിരുന്നു. കോഴിക്കോട് തിരുവമ്പാടി പുളിക്കക്കടവ് വീട്ടിൽ അനിൽ - സുനിത ദമ്പദികളുടെ മകളാണ്.