റിയാദ്: ഒടുവിൽ അബ്ദുറഹീമിനെ ഉമ്മ നേരിൽ കണ്ടു, പതിനെട്ടു വർഷത്തിന് ശേഷം. റിയാദ് ജയിലിൽ കഴിയുന്ന കോഴിക്കോട് കോടമ്പുഴ സ്വദേശി അബ്ദുൽ റഹീമിനെ ഉമ്മ ഫാത്തിമ ഇന്നാണ് ജയിലിൽ എത്തി സന്ദർശിച്ചത്. ഉംറ നിർവഹിച്ച ശേഷം തിരിച്ച് റിയാദിൽ എത്തിയ ഫാത്തിമ റിയാദ് അൽഖർജ് റോഡിലെ അൽ ഇസ്ക്കാൻ ജയിലിൽ എത്തിയാണ് റഹീമിനെ കണ്ടത്. ഇന്ന് രാവിലെ ജയിലിൽ എത്തി നടത്തിയ കൂടിക്കാഴ്ച അര മണിക്കൂറോളം നീണ്ടു. 

കഴിഞ്ഞ ദിവസം റിയാദ് ജയിലിൽ ഇവർ എത്തിയിരുന്നെങ്കിലും അന്ന് റഹീമിനെ കാണാൻ സാധിച്ചിരുന്നില്ല. ഇന്ന് രാവിലെ പത്തിന് റിയാദിലെ ഇന്ത്യൻ എംബസിയിൽ റഹീമിന്റെ ഉമ്മ എത്തിയിരുന്നു. വധശിക്ഷയിൽ ഇളവ് ലഭിച്ച് മോചനം കാത്ത് സഊദിയിലെ ജയിലിൽ കഴിയുന്ന  അബ്ദുൽ റഹീമിനെ കാണാൻ ഉമ്മ ഫാത്തിമയും സഹോദരൻ നസീറും നാല് ദിവസം മുമ്പ് ജയിലിലെത്തിയിരുന്നെങ്കിലും റഹീം ഉമ്മയെ നേരിട്ട് കാണാൻ കൂട്ടാക്കിയിരുന്നില്ല.