കണ്ണൂര്‍: എല്‍.ഡി.എഫ് കണ്‍വീനര്‍ സ്ഥാനത്ത് നിന്നും മാറ്റിയതിന് പിന്നാലെ പാര്‍ട്ടി പരിപാടികളില്‍ നിന്നും വിട്ടു നില്‍ക്കുന്ന ഇ.പി ജയരാജന്‍ അഴീക്കോടന്‍ രാഘവന്‍ അനുസ്മരണത്തിലും പങ്കെടുത്തില്ല. പകരം എം.എം ലോറന്‍സിന്റെ മരണാനന്തര ചടങ്ങില്‍ പങ്കെടുക്കുന്നതിനായി എറണാകുളത്തേക്ക് തിരിച്ചിരിക്കുകയാണ്. കണ്ണൂരില്‍ ഇത് രണ്ടാമത്തെ പരിപാടിയിലാണ് ഇ.പി. പങ്കെടുക്കാതിരിക്കുന്നത്.

ഇന്ന് പയ്യാമ്പലത്ത് നടക്കുന്ന അനുസ്മരണ ചടങ്ങില്‍ ഇ പി ജയരാജന്‍ പങ്കെടുക്കും എന്നായിരുന്നു ജില്ലാ കമ്മിറ്റി അറിയിച്ചത്. അതിനിടയിലാണ് എറണാകുളത്തേക്ക് തിരിച്ചിരിക്കുന്നത്. 

എല്‍.ഡി.എഫ് കണ്‍വീനര്‍ സ്ഥാനത്തുനിന്ന് മാറ്റിയതിന് ശേഷം ഇ.പി പാര്‍ട്ടി പരിപാടികളില്‍ എത്തിയിട്ടില്ല. സി.പി.എം ദേശീയ ജനറല്‍ സെക്രട്ടറിയായിരുന്ന സീതാറാം യെച്ചൂരിയുടെ മരണത്തെ തുടര്‍ന്ന് ഡല്‍ഹിയിലെത്തി അനുശോചനം രേഖപ്പെടുത്തിയതൊഴിച്ചാല്‍ കഴിഞ്ഞ 23 ദിവസമായി ഇ.പി. പൊതുപരിപാടികളില്‍ പങ്കെടുത്തിട്ടില്ല. പാര്‍ട്ടിയുടെ പരിപാടികള്‍ക്ക് പുറമേ പാര്‍ട്ടിയുടെ കമ്മിറ്റികളിലും പങ്കെടുക്കാതെ ഇ.പി. ഒഴിഞ്ഞുമാറുകയാണ്.

സെപ്റ്റംബര്‍ 9ന് നടന്ന ചടയന്‍ ഗോവിന്ദന്‍ അനുസ്മരണ പരിപാടിയില്‍ പാര്‍ട്ടി നിശ്ചയിച്ചെങ്കിലും ഇ പി ജയരാജന്‍ എത്താത്തതും ചര്‍ച്ചയായിരിന്നു. അന്ന് ഇ.പി ആയുര്‍വേദ ചികിത്സയിലാണെന്ന വിശദീകരണമാണ് പാര്‍ട്ടി നല്‍കിയത്.