ന്യൂഡല്‍ഹി: ലോക്സഭാ പ്രതിപക്ഷനേതാവ് രാഹുല്‍ഗാന്ധിക്ക് ഡല്‍ഹിയില്‍ പുതിയ വസതി അനുവദിക്കുമെന്ന് റിപ്പോര്‍ട്ട്. സുനേരി ബാഗ് റോഡിലെ അഞ്ചാം നമ്പര്‍ ബംഗ്ലാവാണ് രാഹുലിന് അനുവദിക്കുകയെന്നാണ് അറിയുന്നത്. പാര്‍ലമെന്റ് ഹൗസ് കമ്മിറ്റിയാണ് ലോക്‌സഭാ പ്രതിപക്ഷ നേതാവിന് ഔദ്യോഗിക വസതി നിര്‍ദ്ദേശിച്ചത്. 

ലോക്‌സഭയിലെ പ്രതിപക്ഷനേതാവെന്ന നിലയില്‍, കാബിനറ്റ് മന്ത്രിമാര്‍ക്കു നല്‍കുന്നതിനു തുല്യമായ വസതിക്ക് (ടൈപ്പ് 8) രാഹുലിന് അര്‍ഹതയുണ്ട്. ക്യാബിനറ്റ് മന്ത്രിമാര്‍, സുപ്രിംകോടതി- ഹൈക്കോടതി ജഡ്ജിമാര്‍, കേന്ദ്രമന്ത്രിമാര്‍, സര്‍ക്കാരിലെ പ്രധാന സെക്രട്ടറിമാര്‍ എന്നിവര്‍ക്കാണ് ടൈപ് എട്ട് ബംഗ്ലാവ് അനുവദിക്കുന്നത്. 

2004ല്‍ ലോക്‌സഭാംഗമായതു മുതല്‍ തുഗ്ലക് ലെയ്‌നിലെ 12ാം നമ്പര്‍ വീടായിരുന്നു രാഹുലിന്റെ ഔദ്യോഗിക വസതി. എന്നാല്‍, അപകീര്‍ത്തിക്കേസില്‍ ശിക്ഷിക്കപ്പെട്ടതോടെ അത് ഒഴിയേണ്ടിവന്നു. സുപ്രിം കോടതി ശിക്ഷ സ്റ്റേ ചെയ്തതോടെ ലോക്‌സഭാംഗത്വം പുനഃസ്ഥാപിക്കുകയും വസതി വീണ്ടും അനുവദിക്കുകയും ചെയ്‌തെങ്കിലും തുഗ്ലക് ലെയ്‌നിലെ വീടൊഴിഞ്ഞതു മുതല്‍ ജന്‍പഥിലെ 10ാം നമ്പര്‍ വസതിയില്‍ അമ്മ സോണിയ ഗാന്ധിക്കൊപ്പമാണ് രാഹുലിന്റെ താമസം.