പത്തനംതിട്ട: തിരുവല്ല വേങ്ങലില്‍ കാറിന് തീപിടിച്ച് രണ്ട് പേര്‍ മരിച്ച സംഭവം ആത്മഹത്യയെന്ന് പൊലിസിന്റെ പ്രാഥമിക നിഗമനം. തിരുവല്ല വേങ്ങലില്‍ പാടത്തോട് ചേര്‍ന്ന ഒറ്റപ്പെട്ട റോഡിലാണ് കാര്‍ തീപിടിച്ച നിലയില്‍ കണ്ടെത്തിയത്. തുകലശ്ശേരി സ്വദേശികളായ രാജു തോമസ്(69), ഭാര്യ ലൈജി തോമസ്(63) എന്നിവരാണ് മരിച്ചത്. മൃതദേഹങ്ങള്‍ കത്തിക്കരിഞ്ഞ നിലയിലാണ്. 

കുടുംബ പ്രശ്‌നങ്ങളെ തുടര്‍ന്ന് ഇവര്‍ ജീവനൊടുക്കിയെന്നാണ് പൊലിസിന്റെ വിലയിരുത്തല്‍. വേങ്ങല്‍ മുണ്ടകം റോഡില്‍ ഒരുമണിയോടെയാണ് അപകടം നടന്നതെന്നാണ് നിഗമനം. പൊലിസ് പട്രോളിങിനിടെയാണ് കാര്‍ കത്തുന്നത് കണ്ടത്. 

മൃതദേഹങ്ങള്‍ ആശുപത്രിയിലേക്ക് മാറ്റി. പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുകൊടുക്കും.