കൊളംബോ: അന്താരാഷ്ട്ര സമുദ്രാതിര്‍ത്തി ലംഘിച്ച് അനധികൃതമായി മീന്‍പിടിച്ചെന്ന കുറ്റത്തിന് തമിഴ്‌നാട്ടില്‍ നിന്നുള്ള 12 മത്സ്യത്തൊഴിലാളികള്‍ക്ക് 98.3 ലക്ഷം രൂപ (3.5 കോടി ലങ്കന്‍ രൂപ) പിഴയിട്ട് ലങ്കന്‍ കോടതി. പിഴയടച്ചില്ലെങ്കില്‍ ആറ് മാസം തടവുശിക്ഷ അനുഭവിക്കണം. 

തൂത്തുക്കുടിയിലെ തരുവൈക്കുളത്തുനിന്നുള്ള 22 മത്സ്യത്തൊഴിലാളികളെ ആഗസ്റ്റ് അഞ്ചിനാണ് ശ്രീലങ്കന്‍ നാവികസേന അറസ്റ്റ് ചെയ്തത്.  രണ്ട് ബോട്ടുകളിലായി മീന്‍പിടിക്കുകയായിരുന്നു ഇവര്‍. ആഗസ്റ്റ് ആറ് മുതല്‍ ഇവര്‍ ജയിലിലാണ,് മറ്റ് 10 പേരുടെ കാര്യത്തില്‍ കോടതി വിധി പിന്നീടുണ്ടാകും.

ലങ്കന്‍ സമുദ്രാതിര്‍ത്തിയില്‍ അതിക്രമിച്ച് കടന്നതിന് രണ്ട് കോടി ലങ്കന്‍ രൂപയും അനധികൃത മീന്‍പിടിത്തത്തിന് 1.5 കോടി ലങ്കന്‍ രൂപയുമാണ് കോടതി പിഴ ചുമത്തിയത്. എന്നാല്‍ പിടിച്ചെടുത്ത ബോട്ടുകളുടെ കാര്യത്തില്‍ കോടതി തീരുമാനം വ്യക്തമാക്കിയിട്ടില്ല. അതേസമയം, മറ്റുള്ള 10 മത്സ്യത്തൊഴിലാളികളുടെ കേസ് സെപ്റ്റംബര്‍ 10നായിരിക്കും കോടതി വീണ്ടും പരിഗണിക്കുക.

അടുത്തിടെ, സമാനമായ മറ്റൊരു സംഭവത്തില്‍ മാന്നാറിലെ ഒരു കോടതി ഒമ്പത് മത്സ്യത്തൊഴിലാളികള്‍ക്ക് 40 ലക്ഷം ലങ്കന്‍ രൂപ പിഴയിട്ടിരുന്നു കൂടാതെ ബോട്ട് പിടിച്ചുവെക്കുകയും ഏഴ് തൊഴിലാളികളെ വെറുതെവിടുകയും രണ്ട് പേരെ ശിക്ഷിക്കുകയും ചെയ്തിരുന്നു. അടുത്തിടെ അനധികൃത മത്സ്യത്തൊഴിലാളികളുടെ ബോട്ടുകള്‍ പിടിച്ചെടുക്കാനുള്ള പുതിയ നിയമം ലങ്കന്‍ കോടതി പാസ്സാക്കിയിരുന്നു. ഇതുപ്രകാരം 177 ഇന്ത്യന്‍ ബോട്ടുകള്‍ ലങ്കന്‍ നാവികസേന പിടിച്ചെടുത്തതായാണ് കണക്ക്.

A Sri Lankan court has imposed a fine of one crore on 12 fishermen from Tamil Nadu for crossing the maritime boundary and engaging in illegal fishing. Stay updated on this development and its implications.