ജൂലൈ 13ന് യുപിഐ സേവനം തടസ്സപ്പെടുമെന്ന് എച്ച്ഡിഎഫ്‌സി ബാങ്ക് അറിയിച്ചു. സിസ്റ്റം നവീകരിക്കുന്നതിന്റെ ഭാഗമായി പുലര്‍ച്ചെ 3:00 മുതല്‍ 3:45 വരെയും 9:30 മുതല്‍ 12:45 വരെയുമാണ് സേവനങ്ങള്‍ മുടങ്ങുക. ബാങ്കിന്റെ പ്രവര്‍ത്തനക്ഷമതയും ശേഷിയും വിശ്വാസ്യതയും വര്‍ധിപ്പിക്കുകയാണ് നവീകരണത്തിലൂടെ ലക്ഷ്യമിടുന്നതെന്ന് ബാങ്ക് വ്യക്തമാക്കി.

നവീകരണ കാലയളവില്‍ നെറ്റ് ബാങ്കിംഗ്, മൊബൈല്‍ ബാങ്കിംഗ് സേവനങ്ങള്‍ എന്നി ലഭ്യമാകില്ലെന്ന് ബാങ്ക് അറിയിച്ചു. കൂടാതെ,ഐഎംപിഎസ്,  നെഫ്റ്റ്, ആര്‍ടിജിഎസ് , എച്ച്ഡിഎഫ്‌സി ബാങ്ക് അക്കൗണ്ട് ടു അക്കൗണ്ട് ഓണ്‍ലൈന്‍ ട്രാന്‍സ്ഫര്‍, ബ്രാഞ്ച് ട്രാന്‍സ്ഫര്‍ എന്നിവയുള്‍പ്പെടെയുള്ള എല്ലാ ഫണ്ട് ട്രാന്‍സ്ഫര്‍  സേവനങ്ങളും ഈ കാലയളവില്‍ ലഭ്യമാകില്ല.

ഉപയോക്താക്കള്‍ക്കുണ്ടാകുന്ന ബുദ്ധിമുട്ട് ഒഴിവാക്കാന്‍ ജൂലൈ 12 വെള്ളിയാഴ്ച വൈകുന്നേരം 7:30 ന് മുമ്പ് ആവശ്യത്തിനുള്ള പണം പിന്‍വലിക്കാനും എല്ലാ ഫണ്ട് ട്രാന്‍സ്ഫറുകളും മുന്‍കൂട്ടി ആസൂത്രണം ചെയ്യാനും എച്ച്ഡിഎഫ്‌സി ബാങ്ക് ഉപഭോക്താക്കളോട് ആവശ്യപ്പെട്ടിട്ടുണ്ട്.

അതേ സമയം ഡെബിറ്റ് കാര്‍ഡ്, ക്രെഡിറ്റ് കാര്‍ഡ് ഇടപാടുകള്‍ തുടരും.സിസ്റ്റം നവീകരിക്കുന്ന കാലയളവില്‍, ഉപഭോക്താക്കള്‍ക്ക് അവരുടെ എച്ച്ഡിഎഫ്‌സി ബാങ്ക് ഡെബിറ്റ് കാര്‍ഡോ ക്രെഡിറ്റ് കാര്‍ഡോ ഉപയോഗിച്ച് ഏത് എടിഎമ്മില്‍ നിന്നും പണം പിന്‍വലിക്കാം.