മുണ്ടക്കൈ, ചൂരൽമല ഉരുൾ ദുരന്തബാധിതർക്ക് സർക്കാർ പ്രഖ്യാപിച്ച ദിനേന 300 രൂപയെന്ന ആശ്വാസധനവും ഓരോമാസവും നൽകുമെന്ന് പറഞ്ഞ ഫുഡ് കൂപ്പണും ലഭിക്കുന്നില്ല. ആദ്യ രണ്ട് മാസം മാത്രമാണ് ആശ്വാസധനമായ 9,000 രൂപ അതിജീവിതർക്ക് ലഭിച്ചത്. ഒമ്പത് മാസം ഇതു നൽകുമെന്നായിരുന്നു സർക്കാരിന്റെ പ്രഖ്യാപനം. 

ആശ്വാസധനത്തിനായി സമീപിക്കുമ്പോൾ ഉദ്യോഗസ്ഥർ ഒഴിഞ്ഞുമാറുകയാണെന്ന് ആക്ഷേപമുണ്ട്. മന്ത്രിസഭ തീരുമാനമെടുത്തെങ്കിലും നിർദേശമൊന്നും ലഭിച്ചിട്ടില്ലെന്നാണ് ഉദ്യോഗസ്ഥർ പറയുന്നത്. ഫുഡ് കൂപ്പൺ ഒരു വർഷത്തേക്ക് നൽകുമെന്നായിരുന്നു സർക്കാരിന്റെ പ്രഖ്യാപനം. എന്നാൽ ഒരു മാസം മാത്രമാണ് അതിജീവിതർക്ക് കൂപ്പൺ ലഭിച്ചത്. 
ചെറിയ പെരുന്നാൾ, വിഷു, ഈസ്റ്റർ എല്ലാം ഒന്നിച്ചെത്തിയിട്ടും കുടുംബങ്ങൾക്ക് ഫുഡ് കൂപ്പൺ ലഭിച്ചിട്ടില്ല. ഇതിന് പുറമെയാണ് ദുരന്തബാധിതർക്ക് വിതരണം ചെയ്യാനായെത്തിച്ച ഭക്ഷ്യ വസ്തുക്കൾ നൽകാതെ പൂഴ്ത്തിവച്ചിരിക്കുന്നത്. ഉപയോഗശൂന്യമായ അരി കണ്ടെത്തിയതിനെ തുടർന്ന് ഭക്ഷ്യസുരക്ഷാ ഉദ്യോഗസ്ഥർ പരിശോധിച്ചശേഷം മാത്രം വിതരണം പുനരാരംഭിച്ചാൽ മതിയെന്ന് അഞ്ചുമാസം മുമ്പ് ജില്ലാ കലക്ടർ ഡി.ആർ മേഖശ്രീ നിർദേശം നൽകിയിരുന്നു. 

എന്നാൽ, ഇതുവരെ പരിശോധന നടക്കുകയോ വിതരണം പുനരാരംഭിക്കുകയോ ചെയ്തിട്ടില്ല. ഇവ ശേഖരണ കേന്ദ്രങ്ങളിൽ കെട്ടിക്കിടന്ന് നശിക്കുകയാണ്. നിലവിൽ പല കുടുംബങ്ങളുടെയും ജീവിതം ദുരിതപൂർണമാണ്. സർക്കാർ നൽകാമെന്നേറ്റ സഹായങ്ങളിൽ വാടക മാത്രമാണ് മുടങ്ങാതെ ലഭിക്കുന്നത്.