കുവൈത്ത് സിറ്റി: സൈന്യത്തില്‍ സ്ത്രീകളെ ഉള്‍പ്പെടുത്താനുള്ള ശ്രമങ്ങള്‍ അവസാന ഘട്ടത്തിലേക്ക് കടന്നതായി കുവൈത്തിലെ ഒരു മുതിര്‍ന്ന സൈനിക കമാന്‍ഡര്‍ പറഞ്ഞു.

സ്ത്രീകളെ സൈന്യത്തില്‍ ഉള്‍പ്പെടുത്തുന്നതിനുള്ള ശ്രമങ്ങളെക്കുറിച്ച് ചര്‍ച്ച ചെയ്യാന്‍ കുവൈത്ത് സൈന്യത്തിന്റെ ഡെപ്യൂട്ടി ചീഫ് ഓഫ് സ്റ്റാഫ് മേജര്‍ ജനറല്‍ സബാഹ് ജാബര്‍ അല്‍ അഹമ്മദ് ദിവസങ്ങള്‍ക്കു മുമ്പ് സൈനിക കമാന്‍ഡര്‍മാരുമായി കൂടിക്കാഴ്ച നടത്തിയിരുന്നു.

സൈന്യത്തിലെ വിവിധ റാങ്കുകളില്‍ സ്ത്രീകളെ ഉള്‍പ്പെടുത്തുന്നതുമായി ബന്ധപ്പെട്ട നിയമപരവും ഭരണപരവുമായ വശങ്ങളും സ്ത്രീകള്‍ക്ക് അവരുടെ കര്‍ത്തവ്യങ്ങള്‍ കാര്യക്ഷമമായി നിര്‍വഹിക്കുന്നതിന് അനുയോജ്യമായ തൊഴില്‍ അന്തരീക്ഷം നല്‍കേണ്ടതിന്റെ പ്രാധാന്യവും യോഗം പരിശോധിച്ചു.

'കുവൈത്ത് സൈന്യത്തില്‍ നടപ്പാക്കുന്ന ആധുനികവല്‍ക്കരണത്തിന്റെയും വികസനത്തിന്റെയും ചട്ടക്കൂടിനുള്ളിലാണ് ഈ നടപടി,' മേജര്‍ ജനറല്‍ സബാഹ് പറഞ്ഞതായി സൈന്യം ഉദ്ധരിച്ചു. വിവിധ സൈനിക മേഖലകളില്‍ കുവൈത്തി സ്ത്രീകള്‍ക്ക് നല്‍കാന്‍ കഴിയുന്ന ഗുണപരമായ സംഭാവനകളെ അദ്ദേഹം പ്രശംസിച്ചു. 

'പദ്ധതി അതിന്റെ അന്തിമ ഘട്ടത്തിലാണ്, അതിന്റെ നടത്തിപ്പിനുള്ള തയ്യാറെടുപ്പിലാണ്,' അദ്ദേഹം കൂട്ടിച്ചേര്‍ത്തു.

2021-ല്‍, കുവൈത്തിന്റെ അന്നത്തെ പ്രതിരോധ മന്ത്രി ഹമദ് ജാബര്‍ അല്‍ സബാഹ്, രാജ്യത്തിന്റെ ചരിത്രത്തിലാദ്യമായി കുവൈത്തി വനിതകള്‍ക്ക് സൈന്യത്തില്‍ ചേരാന്‍ അനുമതി നല്‍കിക്കൊണ്ടുള്ള ഒരു ഉത്തരവ് പുറപ്പെടുവിച്ചിരുന്നു. സ്ത്രീകളുടെ തൊഴില്‍ സിവിലിയന്‍ ജോലികളിലേക്ക് പരിമിതപ്പെടുത്തിയ ഉത്തരവ് പ്രകാരം മെഡിക്കല്‍, സൈനിക സഹായ സേവനങ്ങളില്‍ ജോലി ചെയ്യാമെന്നായിരുന്നു വ്യവസ്ഥ ചെയ്തിരുന്നത്.

Kuwait has entered the final stage of its women's military recruitment process, marking a significant step toward gender inclusion in the armed forces. Final selections and training preparations are underway.