ബംഗളൂരു:  കര്‍ണാടക മുഖ്യമന്ത്രി സിദ്ധരായ്യ ഉള്‍പ്പെടെയുള്ളവര്‍ പ്രതികളായ മൈസൂരു അര്‍ബന്‍ വികസന അതോറിറ്റി(മുഡ) കേസില്‍ ലോകായുക്ത അന്വേഷണം തുടരണമെന്ന് ബംഗളൂരുവിലെ പ്രത്യേക കോടതി. കേസില്‍ സിദ്ധരാമയ്യ, ഭാര്യ ബി.എം പാര്‍വതി തുടങ്ങിയ പ്രതികള്‍ക്ക് ക്ലീന്‍ ചിറ്റ് നല്‍കിക്കൊണ്ടുള്ള ലോകായുക്ത അന്വേഷണ റിപ്പോര്‍ട്ട് ചോദ്യം ചെയ്ത് എന്‍ഫോഴ്‌സ്‌മെന്റ് ഡയരടക്ടറേറ്റ്(ഇ.ഡി) നല്‍കിയ ഹരജി പരിഗണിക്കവെയാണ് ജനപ്രതിനിധികള്‍ക്കായുള്ള ബംഗളൂരുവിലെ പ്രത്യേക കോടതി ഉത്തരവ്. ഇ.ഡി നല്‍കിയ ഹരജി വിധി പറയാന്‍ മാറ്റിയ കോടതി ലോകായുക്തയോട് അന്വേഷണം തുടരാനും നിര്‍ദേശിച്ചു. സിദ്ധരാമയ്യ, ഭാര്യ ബി.എം പാര്‍വതി, ഭാര്യാ സഹേദരന്‍ മല്ലികാര്‍ജുന, മുഡ ഉദ്യോഗസ്ഥര്‍ തുടങ്ങി 13 പേര്‍ക്കെതിരേ സാമൂഹ്യ പ്രവര്‍ത്തകന്‍ സ്‌നേഹമയീ കൃഷ്ണ അടക്കമുള്ള പരാതിക്കാര്‍ ഉന്നയിച്ച അഴിമതി ആരോപണത്തിന് തെളിവില്ലെന്നാണ് ലോകായുക്ത കോടതിയില്‍ സമര്‍പ്പിച്ച റിപ്പോര്‍ട്ടിലുള്ളത്.