ന്യൂഡല്‍ഹി: നാഷണല്‍ ഹെറാള്‍ഡ് കേസില്‍ സോണിയാ ഗാന്ധിക്കും, രാഹുല്‍ ഗാന്ധിക്കുമെതിരെ കുറ്റപത്രം സമര്‍പ്പിച്ച് എന്‍ഫോഴ്‌സ്‌മെന്റ് ഡയറക്ടറേറ്റ്. കേസില്‍ പാര്‍ലമെന്റംഗം സോണിയ ഗാന്ധിയാണ് ഒന്നാം പ്രതി. ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി രണ്ടാം പ്രതി. ഇത് ആദ്യമായാണ് ഇരുവരെയും കേസില്‍ പ്രതിചേര്‍ക്കുന്നത്. 

കുറ്റപത്രം പ്രത്യേക കോടതി ജഡ്ജി വിശാല്‍ ഗോഗ്നെക്ക് മുന്‍പാകെയാണ് സമര്‍പ്പിച്ചത്. തുടര്‍നടപടികള്‍ക്കായി കേസ് 25ലേക്ക് മാറ്റി. 

സോണിയാ ഗാന്ധിക്കും, രാഹുല്‍ ഗാന്ധിക്കും പുറമെ കോണ്‍ഗ്രസ് നേതാക്കളായ സാം പിത്രോഡ, സുമന്‍ ദുബെ എന്നിവരും പട്ടികയിലുണ്ട്. അന്തിരിച്ച നേതാക്കളായ മോത്തിലാല്‍ വോറ, ഓസ്‌കാര്‍ ഫെര്‍ണാണ്ടസ് എന്നിവരുടെ പേരും ഉള്‍പ്പെട്ടിട്ടുണ്ട്. 

അതേസമയം ഇഡിയുടെ നടപടി ഗാന്ധി കുടുംബത്തിനും, കോണ്‍ഗ്രസിനുമെതിരായ ബിജെപിയുടെ പ്രതികാര രാഷ്ട്രീയത്തിന് ഉദാഹരണമാണെന്ന് കോണ്‍ഗ്രസ് നേതാവ് ജയറാം രമേശ് പറഞ്ഞു. നാഷണല്‍ ഹൊറാള്‍ഡിന്റെ സ്വത്തുക്കള്‍ കണ്ടുകെട്ടാനുള്ള നടപടി സര്‍ക്കാര്‍ സ്‌പോണ്‍സര്‍ ചെയ്ത കുറ്റകൃത്യമാണെന്നും അദ്ദേഹം കുറ്റപ്പെടുത്തി. 

അതേസമയം‌ നാഷനൽ ഹെറാൾഡ് കേസുമായി ബന്ധപ്പെട്ട് 661 കോടി രൂപയുടെ സ്വത്തുക്കൾ കണ്ടുകെട്ടാൻ ഇഡി തീരുമാനിച്ചിരുന്നു. 
നാഷനൽ ഹെറാൾഡിന്റെ ഉടമകളായ അസോസിയേറ്റഡ് ജേണൽസ് ലിമിറ്റഡിന്റെ സ്വത്താണ് കണ്ടുകെട്ടുന്നത്. ലഖ്‌നൗ, മുംബൈ, ഡൽഹി എന്നിവിടങ്ങളിലെ വസ്തുവകകൾക്ക് പുറമേ ഡൽഹി ബഹാദൂർ ഷാ സഫർ മാർഗിലെ ഹെറാൾഡ് ഹൗസും കണ്ടുകെട്ടും. കള്ളപ്പണം വെളുപ്പിക്കൽ നിരോധന നിയമത്തിലെ വിവിധ വകുപ്പുകൾ പ്രകാരമാണ് നടപടി.  

1937ൽ ജവാഹർലാൽ നെഹ്റു സ്ഥാപിച്ച നാഷനൽ ഹെറാൾഡ് പത്രത്തിന്റെ ഉടമകളായ അസോസിയേറ്റഡ് ജേണൽസ് ലിമിറ്റഡിനെ പുതുതായുണ്ടാക്കിയ യങ് ഇന്ത്യൻ കമ്പനി ഏറ്റെടുത്തതിൽ അഴിമതിയും വഞ്ചനയുമുണ്ടെന്ന് ആരോപിച്ച് 2012ൽ ബി.ജെ.പി നേതാവ് സുബ്രഹ്മണ്യൻ സ്വാമിയാണ് കേസുമായി രം​ഗത്തെത്തിയത്.

5000 സ്വാതന്ത്ര്യസമര സേനാനികൾക്ക് ഓഹരിയുണ്ടായിരുന്ന ആയിരക്കണക്കിന് കോടിയുടെ ഭൂസ്വത്തുള്ള എ.ജെ.എൽ കമ്പനിയെ യങ് ഇന്ത്യൻ എന്നൊരു ഉപായക്കമ്പനിയുണ്ടാക്കി തട്ടിയെടുത്തുവെന്നായിരുന്നു ആരോപണം. 1,600 കോടി രൂപ മതിക്കുന്ന ഡൽഹിയിലെ ഹെറാൾഡ് ഹൗസ് വെറും 50 ലക്ഷം രൂപയ്ക്കാണ് ഇവർ സ്വന്തമാക്കിയെതെന്നും സുബ്രഹ്മണ്യൻ സ്വാമി ആരോപിച്ചിരുന്നു. 

അസോസിയേറ്റഡ് ജേണൽസ് ലിമിറ്റഡ് ഏറ്റെടുക്കാൻ യങ് ഇന്ത്യൻ കമ്പനിക്ക് ഇന്ത്യൻ നാഷണൽ കോൺഗ്രസ് 90 കോടി രൂപ വായ്പ അനുവദിച്ചിരുന്നുവെന്നും ഇന്ത്യയിലെ ഒരു രാഷ്ട്രീയപാർട്ടിക്കും വാണിജ്യാവശ്യങ്ങൾക്കു വേണ്ടി വായ്പ നൽകാൻ നിയമം അനുവദിക്കുന്നില്ലെന്നും ആരോപിച്ചിരുന്നു. അസോസിയേറ്റഡ് പ്രസ്സ് ഏറ്റെടുക്കാൻ മാത്രമാണീ വായ്പയെന്നും ഇതിനു പുറകിൽ വാണിജ്യ താൽപര്യങ്ങളില്ലെന്നും വിഷയിത്തൽ കോൺഗ്രസ് വിശദീകരണം നൽകിയിരുന്നു.

Enforcement Directorate (ED) has filed a chargesheet against Sonia Gandhi and Rahul Gandhi in the National Herald case. Sonia Gandhi, a Member of Parliament, is named as the first accused, while Rahul Gandhi, the Leader of the Opposition in the Lok Sabha, is the second accused.