മസ്‌കത്ത്: ഒമാനിലെ ഏറ്റവും ഉയരംകൂടിയ പതാകമരം അടുത്തമാസം ഉദ്ഘാടനം ചെയ്യും. അൽ ഖുവൈർ സ്‌ക്വയറിന്റെ ഭാഗമായുള്ള ഏറ്റവും ഉയരം കൂടിയ കൊടിമരം അടുത്ത മാസം ഉദ്ഘാടനം ചെയ്യുമെന്ന് മസ്‌കറ്റ് മുനിസിപ്പാലിറ്റി ചെയർമാൻ അഹമ്മദ് അൽ ഹുമൈദി ആണ് അറിയിച്ചത്.    സ്വകാര്യ മേഖലയുമായി സഹകരിച്ച് 10 മില്യൺ ഡോളർ ചെലവിട്ടാണ് പദ്ധതി പൂർത്തീകരിക്കുന്നത്. മിനിസ്ട്രീസ് ഡിസ്ട്രിക്റ്റിലെ അൽ ഖുവൈർ സ്‌ക്വയർ പദ്ധതിയിൽ ഒമാനിലെ ഏറ്റവും ഉയരം കൂടിയ കൊടിമരം ആണ് പ്രധാന സവിശേഷത. 126 മീറ്റർ ആണ് പതാക മരത്തിൻ്റെ ഉയരം. ഒമാൻ സുൽത്താനേറ്റിന്റെ ചരിത്രത്തിലെ ഏറ്റവും ഉയരം കൂടിയ മനുഷ്യനിർമ്മിത സംവിധാനം ആണ് ഈ കൊടിമരം. 40 നിലകളുള്ള ഒരു കെട്ടിടത്തിന് തുല്യമായ ഉയരം വരും ഇത്. ഇരുമ്പ് കൊണ്ടാണ് ഇത് നിർമ്മിച്ചിരിക്കുന്നത്. കൂടാതെ 135 ടൺ ഉരുക്കും ഉപയോഗിച്ചു. അടിത്തട്ടിലെ കൊടിമരത്തിന്റെ പുറം വ്യാസം 28 മീറ്ററാണ്. അതേസമയം അതിന്റെ ഏറ്റവും ഉയർന്ന പോയിന്റിലെ വ്യാസം 0.9 മീറ്ററാണ്. ഒമാനി പതാകയുടെ അളവുകൾ 18 മീറ്റർ നീളവും 31.5 മീറ്റർ വീതിയുമാണ്.

വിമാനങ്ങൾക്കുള്ള മുന്നറിയിപ്പ് ലൈറ്റിംഗ് സംവിധാനവും കൊടിമരത്തിൽ ഒരുക്കും. 18,000 ചതുരശ്ര മീറ്ററിലധികം വിസ്തൃതിയിൽ വ്യാപിച്ചുകിടക്കുന്ന ഈ പദ്ധതിയിൽ പുല്ല്, ഈന്തപ്പനകൾ, നടക്കാനും സൈക്കിളുകൾക്കുമായി നിർമിച്ച പാതകൾ, ഒരു ഔട്ട്ഡോർ പ്രദർശന സ്ഥലം, സ്കേറ്റ്ബോർഡിംഗ് ഏരിയ തുടങ്ങിയ വിവിധ വിനോദ സൗകര്യങ്ങളും ഉണ്ടായിരിക്കും.

Oman's tallest flagpole to be inaugurated on may