ഷാർജ: ഷാർജയിലെ അൽ നഹ്ദ പ്രദേശത്തെ ബഹുനില റെസിഡൻഷ്യൽ ടവറിലുണ്ടായ വൻ അഗ്നിബാധയിൽ മരിച്ചവരുടെ എണ്ണം അഞ്ചായി. തീപിടിത്തത്തിന് ദൃക്സാക്ഷിയായ നാൽപത് വയസ്സുള്ള പാക്കിസ്ഥാനിയാണ് ഹൃദയാഘതംമൂലം മരിച്ചത്. ദുരന്തത്തിൽ ഇദ്ദേഹത്തിന് പരുക്ക് പറ്റിയിരുന്നില്ല. സംഭവത്തിൽ മരിച്ച നാലുപേരും ആഫ്രിക്കൻ വംശജർ ആണ്. ഇവരെ തിരിച്ചറിഞ്ഞിട്ടില്ല. തീപിടുത്തത്തിൽനിന്ന് രക്ഷപ്പെടാൻ ശ്രമിക്കുന്നതിനിടെ താഴേക്ക് ചാടിയത് ആണ് ഇവരുടെ മരണകാരണം. 

42 റെസിഡൻഷ്യൽ നിലകളും ഒമ്പത് നില പാർക്കിംഗ് സൗകര്യങ്ങളും ഉള്ള 51 നില കൂറ്റൻ കെട്ടിടത്തിലാണ് തീപിടുത്തമുണ്ടായത്. അറ്റകുറ്റപ്പണികൾക്കായി സജ്ജീകരിച്ച കയറുകളും സ്കാഫോൾഡിംഗും ഉപയോഗിച്ച് രക്ഷപ്പെടാൻ ശ്രമിക്കുന്നതിനിടെ ആണ് ഇവർ മരിച്ചത്. ചിലർ കയറുകൾ ഉപയോഗിച്ച് താഴേക്ക് ഇറങ്ങുകയും രക്ഷപ്പെട്ടതായും റിപ്പോർട്ടുണ്ട്. മറ്റുള്ളവർ പിന്തുടരാൻ ശ്രമിച്ചെങ്കിലും പിടി നഷ്ടപ്പെട്ട് വീഴുകയായിരുന്നു. 

ഒന്നിലധികം സ്റ്റേഷനുകളിൽ നിന്നുള്ള അഗ്നിശമന യൂണിറ്റുകൾ സ്ഥലത്തെത്തിയാണ് തീ നിയന്ത്രണവിധേയമാക്കിയത്. തീ പിടിത്തത്തിന്റെ  കാരണം  കണ്ടെത്തുന്നതിനായി അന്വേഷണം ആരംഭിച്ചിട്ടുണ്ട്. കെട്ടിടത്തിന്റെ ഏറ്റവും മുകളിലെ രണ്ട് നിലകളിലാണ് അഗ്നിബാധയുണ്ടായതന്ന് ദൃക് സാക്ഷികൾ മൊഴി നൽകിയിട്ടുണ്ട്. 

 സംഭവത്തെതുടർന്ന് 148 താമസക്കാരെ സുരക്ഷിതമായി ഒഴിപ്പിച്ചതായി അധികൃതർ സ്ഥിരീകരിച്ചു. ഇവരെ ഇന്നലെ രാത്രിയോടെ അവരുടെ ഫ്ലാറ്റിലേക്ക് മടങ്ങാൻ അനുവദിച്ചു.

പുക ശ്വസിച്ചതും നിസ്സാര പരിക്കുകളും കാരണം ആറ് പേരെ ആശുപത്രിയിൽ പ്രവേശിപ്പിച്ചു. മറ്റുള്ളവർക്ക് സ്ഥലത്തുതന്നെ പ്രാഥമിക പരിചരണം നൽകി.  ആശുപത്രിയിൽ കഴിയുന്നവരുടെ നില ആശ്വാസകരമാണ്. ഇവർ ഉടൻ ആശുപത്രി വിടുമെന്ന് അധികൃതർ അറിയിച്ചു. 

സംഭവസമയത്ത് ഫയർ അലാറം കേട്ടില്ലെന്ന് 21-ാം നിലയിൽ താമസിക്കുന്ന  ഈജിപ്ഷ്യൻ നിവാസി  പറഞ്ഞു. ഇടനാഴിയിൽ പുക കണ്ടു, പടികൾ ഇറങ്ങി ഓടി. ഞങ്ങൾ നിലത്ത് എത്തിയപ്പോൾ എമർജൻസി സംഘങ്ങൾ ഇതിനകം അവിടെ ഉണ്ടായിരുന്നു. ഞങ്ങളെ സുരക്ഷിത സ്ഥാനത്തേക്ക് നയിച്ചു- അദ്ദേഹം പറഞ്ഞു. 

എല്ലാ റെസിഡൻഷ്യൽ കെട്ടിടങ്ങളിലും ഫയർ അലാറം സംവിധാനങ്ങൾ നിലനിർത്താനും പതിവായി സുരക്ഷാ പരിശോധനകൾ നടത്താനും അധികൃതർ ആവശ്യപ്പെട്ടിട്ടുണ്ട്.

Death toll to five in Sharjah massive residential building fire