കൊച്ചി: സംവിധായകനും നടനുമായ പൃഥ്വിരാജ് സുകുമാരന്റെ ഭാര്യയും മാധ്യമപ്രവര്‍ത്തകയുമായ സുപ്രിയ മേനോനെതിരെ വിവാദ പരാമര്‍ശവുമായി ബിജെപി നേതാവ് അഡ്വ. ബി ഗോപാലകൃഷ്ണന്‍. സൂപ്രിയയെ അര്‍ബന്‍ നക്‌സലാണെന്നു വിശേഷിപ്പിച്ച ഗോപാലകൃഷ്ണന്‍, ആദ്യം അവളെ നിലയ്ക്ക് നിര്‍ത്താനാണ് അമ്മായി അമ്മയായ മല്ലിക സുകുമാരന്‍ ശ്രമിക്കേണ്ടതെന്നു പറഞ്ഞു. അങ്കമാലിയില്‍ നടന്ന ആശാ വര്‍ക്കര്‍മാരുടെ സമരപരിപാടിയിലായിരുന്നു ഗോപാലകൃഷ്ണന്റെ പരാമര്‍ശം.

"ഒരു വിഭാഗത്തെ മുഴുവന്‍ ഒറ്റപ്പെടുത്തിയപ്പോള്‍ ഇപ്പോഴത്തെ അവസ്ഥയെന്ത്? മോഹന്‍ലാലിന് ഖേദപ്രകടനം നടത്തേണ്ടി വന്നില്ലേ?" എന്നുപറഞ്ഞ ഗോപാലകൃഷ്ണന്‍, മേജര്‍ രവിയും ഇതിനെ കുറിച്ച് ആലോചിക്കണമെന്ന് ആവശ്യപ്പെട്ടു. "മേജര്‍ രവി മനസ്സിലാക്കണം, എല്ലാ കാര്യങ്ങളും മോഹന്‍ലാലിനോട് പറഞ്ഞിട്ടാണ് പൃഥ്വിരാജ് ചെയ്തതെന്ന്. അതിനര്‍ഥം മോഹന്‍ലാലിനെ പരോക്ഷമായി എതിര്‍ക്കുക, മേജര്‍ രവിയെ പ്രത്യക്ഷമായി എതിര്‍ക്കുക എന്നതാണോ?" എന്നും അദ്ദേഹം ചോദിച്ചു.

മല്ലിക സുകുമാരന്‍ തന്റെ വീട്ടിലെ പ്രശ്നങ്ങള്‍ പരിഹരിക്കണമെന്നു വ്യക്തമാക്കിക്കൊണ്ടാണ് ബി ഗോപാലകൃഷ്ണന്‍ വിമര്‍ശനം ഉന്നയിച്ചത്. "നിന്റെ വീട്ടില്‍ ഒരാള്‍ ഉണ്ട് അല്ലേ? മല്ലിക സുകുമാരന്റെ മരുമകള്‍. അവള്‍ അര്‍ബന്‍ നക്‌സലാണ്. അവളുടെ ഫെയ്‌സ്ബുക്ക് പോസ്റ്റില്‍ പറയുന്നത് പോലെ തരത്തില്‍ കളിക്കെടാ, എന്റെ ഭര്‍ത്താവിനോട് വേണ്ട. . ആദ്യം ആ അഹങ്കാരിയെ നിലയ്ക്ക് നിര്‍ത്താനാണ് അമ്മായി അമ്മ ശ്രമിക്കേണ്ടത്" എന്നായിരുന്നു ഗോപാലകൃഷ്ണന്റെ വാക്കുകള്‍.

മോഹന്‍ലാല്‍ വലിയ നടനായിരിക്കുമ്പോഴും അദ്ദേഹത്തിന്റെ ഖേദപ്രകടനം ചില രാഷ്ട്രീയ നേതാക്കള്‍ക്കു വിഷമം സൃഷ്ടിക്കുന്നുവെന്ന് ഗോപാലകൃഷ്ണന്‍ പരിഹസിച്ചു. "പിണറായിക്കും ബിനോയ് വിശ്വത്തിനും ശിവന്‍കുട്ടിക്കും വിഷമം. നിങ്ങള്‍ ഈ വിഷമം കാണേണ്ട, ആശാ വര്‍ക്കര്‍മാരുടെ വിഷമം കാണൂ" എന്നായിരുന്നു അദ്ദേഹത്തിന്റെ നിലപാട്.

BJP leader Adv. B Gopalakrishnan made a controversial remark against Supriya Menon, journalist and wife of actor Prithviraj Sukumaran, calling her an "Urban Naxal." He also urged veteran actress Mallika Sukumaran to "control" her daughter-in-law. His statement, made during an Asha workers' protest in Angamaly, has sparked debate.