തിരുവനന്തപുരം: സംസ്ഥാന സര്‍ക്കാരിന്റെ ബജറ്റ് നിരക്ക് വര്‍ധനവും ഇളവുകളും ആനുകൂല്യങ്ങളുമെല്ലാം ഇന്നുമുതല്‍ പ്രാബല്യത്തില്‍. ഭൂനികുതിയും വാഹന നികുതിയും കൂടിയിട്ടുണ്ട്. വൈദ്യുതി ചാര്‍ജ് യൂനിറ്റിന് 12 പൈസ വച്ചാണ് കൂടുക. സര്‍ക്കാര്‍ 
ഉത്തരവിറക്കാത്തതിനാല്‍ വെള്ളക്കരത്തിലെ 5 ശതമാനത്തിന്റെ വര്‍ധന പ്രാബല്യത്തില്‍ വരുന്നതല്ല. 15 വര്‍ഷം കഴിഞ്ഞ വാഹനങ്ങളുടെ നികുതിയും കൂടിയിട്ടുണ്ട്.

ഇരുചക്ര വാഹനങ്ങള്‍ക്കും മുചക്ര വാഹനങ്ങള്‍ക്കും 900 രൂപയുണ്ടായിരുന്നത് 1350 രൂപയായി വര്‍ധിച്ചു. സ്വകാര്യ  കാറുകള്‍ക്ക് ഭാരമനുസരിച്ച് 750 കിലോ വരെ 9600 രൂപ 1500 കിലോ വരെ 12,900 രൂപയും അതിനു മുകളില്‍ 15,900 രൂപയുമാണ് നികുതി വരുക. എല്ലാ ഇലക്ട്രിക് വാഹനങ്ങള്‍ക്കും 5 ശതമാനം നികുതി എന്നത് മാറിയിട്ടുണ്ട്. 15 ലക്ഷം വരെ വിലയുള്ളവയ്ക്ക് 5 ശതമാനവും 20 ലക്ഷം വരെ വിലയുള്ളവയ്ക്ക് 8 ശതമാനവും അതിനുമുകളിലുള്ളവയ്ക്ക് 10 ശതമാനവുമാണ് നികുതി വര്‍ധന.

ഇരുചക്രവാഹനങ്ങള്‍ക്കും മുചക്ര വാഹനങ്ങള്‍ക്കും 5 ശതമാനമായി തന്നെ നികുതി തുടരും. കോണ്‍ട്രാക്ട് ക്യാരേജ് വാഹനങ്ങളുട സീറ്റിനനുസരിച്ചുള്ള നികുതിയും ഏകീകരണവും പ്രാബല്യത്തിലായി. ഭൂ നികുതിയില്‍ 50 ശതമാനമാണ് വര്‍ധന. ഭൂമിയുടെ അളവനുസരിച്ച് സ്ലാബ് അടിസ്ഥാനത്തിലാണ് നിരക്ക് കൂടുക. ഒരു കാറിന് രണ്ടര മുതല്‍ 15 രൂപ വരെ വര്‍ധിക്കും. 23 ഇനം കോടതി ഫീസുകളും വര്‍ധിച്ചു. സര്‍ക്കാര്‍ ജീവനക്കാരുടെ ക്ഷാമബത്തയില്‍ 3 ശതമാനം വര്‍ധന ഏപ്രില്‍ മാസത്തിലെ ശമ്പളത്തോടൊപ്പം കിട്ടുന്നതാണ്. ദിവസവേതന കരാര്‍ ജീവനക്കാരുടെ ശമ്പളവും 5 ശതമാനം വര്‍ധിക്കുന്നതാണ്.