ഇംഫാല്‍: മണിപ്പൂരിലുണ്ടായ വംശീയ സംഘര്‍ഷത്തിന് രണ്ടാണ്ട് തികയാനിരിക്കെ അതിജീവനത്തിനായി നെട്ടോട്ടം ഓടുകയാണ് പതിനായിരക്കണക്കിന് വരുന്ന ദുരിത ബാധിതര്‍. 2023 മെയ് മൂന്നിന് ആരംഭിച്ച വംശീയ സംഘര്‍ഷങ്ങളില്‍ നിരവധി പേരാണ് കൊല്ലപ്പെട്ടത്. അനേകം പേര്‍ തൊട്ടടുത്ത സംസ്ഥാനങ്ങളിലേക്ക് പലായനം ചെയ്തപ്പോള്‍ 60,000 പേര്‍ സംസ്ഥാനത്തെ വിവിധ ദുരിതാശ്വാസ ക്യാമ്പുകളില്‍ അഭയം കണ്ടെത്തി. ഇതില്‍ 25,000 പേരും കുട്ടികളാണ്.

ഇവരെല്ലാം ഇപ്പോള്‍ അതിജീവനത്തിനായി പുതിയ മേഖലകളില്‍ വ്യാപൃതരാണ്. മെയ്തി ഭൂരിപക്ഷ മേഖലയായ ഇംഫാല്‍ താഴ് വരയില്‍ ഉള്ളതിന്റെ ആറിരട്ടി കുക്കി ഗോത്ര വിഭാഗക്കാരാണ് ഇന്നും വിവിധ ക്യാംപുകളില്‍ കഴിയുന്നത്. സര്‍ക്കാര്‍ ഏതാനും പേര്‍ക്ക് പേരിന് മാത്രം വീടുകള്‍ വച്ചുനല്‍കിയപ്പോള്‍ കുക്കികള്‍ പൂര്‍ണമായും തഴയപ്പെട്ടു. ഇപ്പോള്‍ കലാപത്തിന് മുമ്പുള്ള നല്ല ജീവിതത്തിന്റെ ഓര്‍മകളുമായി ജീവിതം തള്ളിനീക്കുകയാണിവര്‍.

ക്യാംപുകളിലെ നൂറുകണക്കിന് സ്ത്രീകള്‍ നിത്യവൃത്തിക്കായി സ്വയം തൊഴില്‍ കണ്ടെത്തി അവ റോഡരുകില്‍ നിന്ന് വില്‍പ്പന നടത്തുന്ന കാഴ്ച എവിടെയും കാണാം. വിവിധ കളിപ്പാട്ടങ്ങളും ഭക്ഷണ സാധനങ്ങളുമൊക്കെ കിട്ടുന്ന വിലയ്ക്ക് വിറ്റ് ഉപജീവനം കണ്ടെത്തുന്നു. കുട്ടികളും അവരുടെ രക്ഷിതാക്കളുടെ കൂടെ ചേര്‍ന്ന് സ്വയം സംരംഭങ്ങളില്‍ സഹായത്തിനുണ്ട്. വിദ്യാഭ്യാസം നഷ്ടപ്പെട്ട നൂറുകണക്കിന് കുട്ടികളെ എവിടെയും കാണാം.

എങ്ങോട്ട് പോകണമെന്നറിയാത്ത ഇത്തരക്കാരില്‍ കുറച്ചുപേര്‍ തീവ്രവാദ ഗ്രൂപ്പുകളില്‍ സജീവമായിക്കഴിഞ്ഞു. കലാപത്തിന് രണ്ട് വര്‍ഷം തികയാനിരിക്കെ ദുരിതാശ്വാസ ക്യാമ്പുകളില്‍ കഴിയുന്ന 60,000 പേരെ എങ്ങനെ സംക്ഷിക്കുമെന്ന് ആരും പറയുന്നില്ല. ഇപ്പോള്‍ സംസ്ഥാനം രാഷ്ടപതി ഭരണത്തിനു കീഴിലായതോടെ ഇവരുടെ ആവശ്യങ്ങള്‍ വീണ്ടും അവഗണിക്കപ്പെടുകയാണ്. ഇതിനിടയിലും ചെറിയ സംരംഭങ്ങളിലൂടെ സ്ത്രീകള്‍ നടത്തുന്ന കൂട്ടായ്മകളില്‍ അതിജീവനം കണ്ടെത്തുകയാണിവര്‍.