മലപ്പുറം: സംസ്ഥാനത്ത് പ്ലസ്‌വൺ അധിക ബാച്ചുകൾ അനുവദിച്ചിട്ടും ഒരു ക്ലാസിൽ 60ലേറെ വിദ്യാർഥികൾ ഇരുന്ന് പഠിക്കുന്നത് 664 സർക്കാർ സ്‌കൂളുകളിൽ. ഇതിൽ 494 എണ്ണവും മലബാറിലാണെന്ന് വിദ്യാഭ്യാസ വകുപ്പിന്റെ പുതിയ കണക്കുകൾ പറയുന്നു. 155 ഹയർസെക്കൻഡറി സ്‌കൂളുകളിൽ ഈ അധ്യയനവർഷം പ്രിൻസിപ്പൽമാരുണ്ടായിട്ടുമില്ല. ഇതിൽ 116 എണ്ണവും മലബാറിലെ സ്‌കൂളുകളിലാണ്.

മലബാറിലെ 494 സ്‌കൂളുകളിൽ 1014 ബാച്ചുകളിലാണ് 60ലേറെ വിദ്യാർഥികൾ പഠിക്കുന്നത്. തെക്കൻ ജില്ലകളിലെ 170 സ്‌കൂളുകളിൽ 35 ബാച്ചുകളിലും 60ന് മുകളിൽ വിദ്യാർഥികളുണ്ട്. 25ൽ താഴെ കുട്ടികൾ പഠിക്കുന്ന സ്‌കൂളുകൾ മലബാറിൽ 25 എണ്ണമാണുള്ളത്. തെക്കൻ ജില്ലകളിലിത് 71 എണ്ണമാണ്. മലബാറിൽ രണ്ട് എയ്ഡഡ് സ്‌കൂളുകളിലാണ് 25ൽ താഴെ കുട്ടികൾ പഠിക്കുന്നത്. തെക്കൻ ജില്ലകളിൽ ഇങ്ങനെയുള്ള 15 എയ്ഡഡ് സ്‌കൂളുകളുണ്ട്. 

50 ആണ് ഹയർസെക്കൻഡറി ക്ലാസിൽ ശരാശരി കുട്ടികളുടെ എണ്ണം. ഈ ക്ലാസ് മുറികളിലാണ് 70ലേറെ കുട്ടികൾ പഠിക്കേണ്ടത്. ഈ അധ്യയനവർഷം ഏറെ പ്രതിഷേധങ്ങൾക്കൊടുവിലാണ് മലബാറിൽ കൂടുതൽ താൽക്കാലിക പ്ലസ്‌വൺ സീറ്റുകൾ അനുവദിച്ചത്. ഇവിടെയെല്ലാം താൽക്കാലിക അധ്യാപകരെയാണ് നിയമിച്ചിട്ടുള്ളത്. 

സ്‌കൂളുകളിൽ പ്രധാനാധ്യാപകരില്ലാത്തതും ഹയർസെക്കൻഡറിയെ ബാധിക്കുന്നുണ്ട്. കാസർകോട് ജില്ലയിൽ 38 ഹയർസെക്കൻഡറി സ്‌കൂളുകളിൽ ഇപ്പോഴും പ്രിൻസിപ്പൽമാരില്ല. കണ്ണൂർ 26,വയനാട് 15, മലപ്പുറം 27,കോഴിക്കോട് 1, പാലക്കാട് 9, തൃശൂർ 16, എറണാകുളം 7, ഇടുക്കി 15, പത്തനംതിട്ട 1 എന്നിങ്ങനെ പ്രിൻസിപ്പൽ തസ്തികകൾ ഒഴിഞ്ഞുകിടക്കുകയാണ്.