കൊൽക്കത്ത: 2025 ഐപിഎൽ ആരംഭിക്കാൻ ഇനി ദിവസങ്ങൾ മാത്രമേ ബാക്കിയുള്ളൂ. മാർച്ച് 22ന് ആരംഭിക്കുന്ന ടൂർണമെന്റിന്റെ ആദ്യ മത്സരത്തിൽ നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സും റോയൽ ചലഞ്ചേഴ്സ് ബാംഗ്ലൂരും തമ്മിലാണ് ഏറ്റുമുട്ടുന്നത്. ഇന്ത്യൻ താരം അജിങ്ക്യ രഹാനെയുടെ നേതൃത്തിലാണ് കൊൽക്കത്ത ഇത്തവണ കിരീട പോരാട്ടത്തിനിറങ്ങുന്നത്. ആദ്യ മത്സരത്തിൽ കൊൽക്കത്തയുടെ ക്യാപ്റ്റനായി കളത്തിലിറങ്ങുന്നതോടെ രഹാനെക്ക് മറ്റൊരു ഇന്ത്യൻ താരത്തിനും സ്വന്തമാക്കാൻ കഴിയാത്ത ഒരു നേട്ടം കൈപ്പിടിയിലാക്കാൻ സാധിക്കും. 

ഐപിഎല്ലിൽ മൂന്ന് വ്യത്യസ്ത ടീമുകളെ നയിക്കുന്ന ആദ്യ ഇന്ത്യൻ താരമായി മാറാനാണ് രഹാനെക്ക് സാധിക്കുക. ഇതിനു മുമ്പ് ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിനെയും റൈസിംഗ് പൂനെ സൂപ്പർ ജയന്റ്സിനെയുമാണ് രഹാനെ നയിച്ചിട്ടുള്ളത്. രാജസ്ഥാൻ റോയൽസിനെ 24 മത്സരത്തിലാണ് രഹാനെ നയിച്ചിട്ടുള്ളത്.

2017ൽ എംഎസ് ധോണിയുടെ അഭാവത്തിൽ റൈസിങ് പൂനെ സൂപ്പർ ജയന്റ്സിനെയും രഹാനെ നയിച്ചിട്ടുണ്.  2020-21ൽ നടന്ന ബോർഡർ ഗവാസ്കർ ട്രോഫിയിൽ ഇന്ത്യ നേടിയത് രഹാനെയുടെ കീഴിലാണ്. ഓസ്ട്രേലിയക്കെതിരെ 2-1നാണ് ഇന്ത്യ വിജയിച്ചത്. അടുത്തിടെ അവസാനിച്ച സയ്യിദ് മുഷ്താഖ് അലി ട്രോഫിയിലും തകർപ്പൻ പ്രകടനമായിരുന്നു രഹാനെ നടത്തിയിരുന്നത്. മുംബൈക്ക് വേണ്ടി 58.62 എന്ന മികച്ച ആവറേജിൽ 469 റൺസാണ് രഹാനെ അടിച്ചെടുത്തത്. 

മെഗാ ലേലത്തിൽ 23.75 കോടി രൂപക്ക്‌ കൊൽക്കത്ത സ്വന്തമാക്കിയ വെങ്കിടേഷ് അയ്യരെ കൊൽക്കത്ത ക്യാപ്റ്റനായി നിയമിക്കുമെന്ന വാർത്തകൾ ശക്തമായി നിലന്നിരുന്നു. എന്നാൽ ഇതിനെയെല്ലാം മറികടന്നാണ് രഹാനെക്ക്‌ കൊൽക്കത്ത ക്യാപ്റ്റൻ സ്ഥാനം നൽകിയത്. മെഗാ ലേലത്തിൽ 1.50 കോടി രൂപയ്ക്കാണ് രഹാനെയെ കൊൽക്കത്ത സ്വന്തമാക്കിയത്.

കഴിഞ്ഞ സീസണിൽ കൊൽക്കത്തയെ ചാമ്പ്യൻമാരാക്കിയ ശ്രേയസ് അയ്യരിനെ കൊൽക്കത്ത ടീമിൽ നിലനിർത്താതെ പോവുകയായിരുന്നു. ഐപിഎൽ മെഗാ ലേലത്തിൽ 26.5 കോടിക്ക് ശ്രേയസിനെ പഞ്ചാബ് കിങ്‌സ് ആണ് അയ്യരെ സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്.