കുവൈത്ത് സിറ്റി: അഷിര്‍ജ് തീരത്ത് ഉപേക്ഷിക്കപ്പെട്ട മറൈന്‍ കപ്പലുകളുടെയും മറ്റു കപ്പലുകളുടെയും ഉടമകള്‍ക്ക് ആഭ്യന്തര മന്ത്രാലയത്തിന് കീഴിലുള്ള ജനറല്‍ ഡയറക്ടറേറ്റ് ഓഫ് കോസ്റ്റ് ഗാര്‍ഡ് മുന്നറിയിപ്പ് നല്‍കി. നിശ്ചിത സമയപരിധിക്കുള്ളില്‍ കപ്പലുകളുടെ രേഖകള്‍ അപ്‌ഡേറ്റ് ചെയ്യുന്നതിന് ഉടമകള്‍ അര്‍ദിയ ഇന്‍ഡസ്ട്രിയല്‍ ഏരിയയിലെ കോസ്റ്റ് ഗാര്‍ഡിന്റ ആസ്ഥാനം സന്ദര്‍ശിക്കണമെന്ന് അഭ്യര്‍ത്ഥിച്ചു.

ഉപേക്ഷിക്കപ്പെട്ട കപ്പലുകള്‍ മൂലമുണ്ടാകുന്ന മലിനീകരണത്തില്‍ നിന്ന് തീരപ്രദേശവും സമുദ്ര പരിസ്ഥിതിയും സംരക്ഷിക്കുന്നതിനുമുള്ള നിരന്തരമായ ശ്രമങ്ങളുടെ ഭാഗമാണ് ഈ സംരംഭം.

2024 ഓഗസ്റ്റ് 4ന് ഔദ്യോഗിക ഗസറ്റില്‍ പ്രസിദ്ധീകരിച്ച ഒരു അറിയിപ്പ് അനുസരിച്ച് കപ്പലുകളുടെ ഉടമസ്ഥാവകാശം തെളിയിക്കുന്ന യഥാര്‍ത്ഥ രേഖകളോ സാക്ഷ്യപ്പെടുത്തിയ പകര്‍പ്പുകളോ അവയുടെ നിലവിലെ അവസ്ഥയെക്കുറിച്ചുള്ള വിശദമായ റിപ്പോര്‍ട്ടിനൊപ്പം കപ്പല്‍ ഉടമകള്‍ സമര്‍പ്പിക്കേണ്ടതുണ്ട്. ഇക്കാര്യം പാലിക്കുന്നതില്‍ പരാജയപ്പെടുന്നത് ഉപേക്ഷിക്കപ്പെട്ട കപ്പലുകള്‍ നീക്കം ചെയ്യുന്നതുമായി ബന്ധപ്പെട്ട ചെലവുകള്‍ക്ക് ഉടമകളെ ഉത്തരവാദികളാക്കുന്നത് ഉള്‍പ്പെടെയുള്ള നിയമനടപടികള്‍ക്ക് കാരണമാകുമെന്ന് ഡയറക്ടറേറ്റ് മുന്നറിയിപ്പ് നല്‍കി.

1980ലെ 28ാം നമ്പര്‍ സമുദ്ര വ്യാപാര നിയമത്തിലെയും 2014ലെ 42ാം നമ്പര്‍ പരിസ്ഥിതി പബ്ലിക് അതോറിറ്റി നിയമത്തിലെയും വ്യവസ്ഥകള്‍ക്കും അവയുടെ ഭേദഗതികള്‍ക്കും അനുസൃതമായാണ് ഈ നടപടിയെന്ന് ആഭ്യന്തര മന്ത്രാലയം പറഞ്ഞു. സമുദ്ര പരിസ്ഥിതി സംരക്ഷിക്കുകയും കുവൈത്തിലെ തീരപ്രദേശങ്ങളുടെ സുരക്ഷയും സുസ്ഥിരതയും ഉറപ്പാക്കുകയും ചെയ്യുക എന്നതാണ് സംരഭത്തിന്റെ ലക്ഷ്യം.

Kuwait begins action to seize abandoned ships