കെയ്‌റോ: ഗസ്സ പിടിച്ചെടുക്കാനുള്ള യു.എസ് പ്രസിഡന്റ് ഡൊണാള്‍ഡ് ട്രംപിന്റെ പദ്ധതിക്ക് ബദലുമായി ഈജിപ്ത്. ഗസ്സയില്‍നിന്ന് ഹമാസിനെ മാറ്റിനിര്‍ത്തിക്കൊണ്ടുള്ള പദ്ധതിയാണ് ഈജിപ്ത് മുന്നോട്ട് വെക്കുന്നത്. നിലവിലെ ഭരണകര്‍ത്താക്കളായ ഹമാസിനു പകരം ഗസ്സയില്‍ അറബ്, പാശ്ചാത്യ രാജ്യങ്ങള്‍ നിയന്ത്രിക്കുന്ന ഇടക്കാല ഭരണ സംവിധാനം കൊണ്ടുവരുമെന്നതാണ് പുതിയ പദ്ധതിയെന്ന് വാര്‍ത്താ ഏജന്‍സിയായ റോയിട്ടേഴ്‌സിനു ലഭിച്ച കരട് രേഖയില്‍ വ്യക്തമാക്കുന്നു.

ഇന്ന് കെയ്‌റോയില്‍ ചേരുന്ന അടിയന്തര അറബ് ഉച്ചകോടിയില്‍ ബദല്‍ പദ്ധതിയുടെ കരട് അവതരിപ്പിക്കുമെന്നാണ് സൂചന.  സഊദി അറേബ്യ, യുഎഇ, ജോര്‍ദന്‍ തുടങ്ങിയ രാജ്യങ്ങള്‍ ബദല്‍ പദ്ധതിയുടെ ചര്‍ച്ചയില്‍ ഭാഗമാണെന്നാണ് റിപ്പോര്‍ട്ട് സൂചിപ്പിക്കുന്നത്. അതേസമയം, 2023 ഒക്ടോബര്‍ ഏഴിലെ ആക്രമണങ്ങളെത്തുടര്‍ന്ന് ആരംഭിച്ച യുദ്ധം അവസാനിപ്പിച്ച് സ്ഥിരമായ സമാധാനം പുനഃസ്ഥാപിച്ചതിനു ശേഷമാണോ പദ്ധതി നടപ്പിലാക്കുന്നതെന്ന കാര്യത്തില്‍ വ്യക്തതയില്ല.

ഫലസ്തീന്‍ ജനതയെ ഒഴിപ്പിച്ചശേഷം ഗസ്സ ഏറ്റെടുത്ത് ഉല്ലാസകേന്ദ്രമാക്കി മാറ്റുമെന്നായിരുന്നു  ട്രംപ് പ്രഖ്യാപിച്ചത്. ഒഴിപ്പിക്കുന്ന ഫലസ്തീനി ജനതയെ ജോര്‍ദാനും ഈജിപ്തും ഏറ്റെടുക്കണമെന്നും ട്രംപ് ആവശ്യപ്പെട്ടു. 

കൂടാതെ ഗസ പുനര്‍നിര്‍മാണത്തിന്റെ ചെലവ് ആരു വഹിക്കുമെന്നതിനെ കുറിച്ചും ബദല്‍ പദ്ധതിയുടെ കരടില്‍ ഈജിപ്ത് പരാമര്‍ശിക്കുന്നില്ല. ഹമാസിനെ മാറ്റിനിര്‍ത്തി ഗസ്സയുടെ ഭരണനിര്‍വഹണം എങ്ങനെ സാധ്യമാകുമെന്നതും കരടില്‍ വ്യക്തമല്ല. ഈജിപ്തിന്റെ പദ്ധതിക്ക് മറ്റു അറബ് രാജ്യങ്ങളുടെ പിന്തുണയുണ്ടോയെന്നതും റിപ്പോര്‍ട്ടില്‍ വ്യക്തമല്ല.