മലപ്പുറം: ലഹരിക്കെതിരായ ജാഗ്രത സ്വന്തം വീടുകളില്‍ നിന്ന് തുടങ്ങണമെന്ന് മുസ്‌ലിം ലീഗ് സംസ്ഥാന അധ്യക്ഷന്‍ പാണക്കാട് സാദിഖലി തങ്ങള്‍. സ്വന്തം സുരക്ഷിതമെന്ന് ആരും കരുതേണ്ടതല്ലെന്നും അദ്ദേഹം ഓര്‍മിപ്പിക്കുന്നു. മലപ്പുറം ചെമ്മാട് സംഘടിപ്പിച്ച റമദാന്‍ പ്രഭാഷണ പരിപാടിയിലായിരുന്നു അദ്ദേഹത്തിന്റെ പരാമര്‍ശം. 

'എന്റെ വീട്ടില്‍ കള്ളന്‍ കയറില്ലെന്ന് ആരും കരുതരുത്. അശ്രദ്ധ ഉണ്ടായാല്‍ എവിടെ വേണമെങ്കിലും ലഹരി കടന്നുവരാം'സാദിഖലി തങ്ങള്‍ വ്യക്തമാക്കി. 

'വീട്ടില്‍ നിന്നുതന്നെയാണ് ജാഗ്രത തുടങ്ങേണ്ടത്. നമ്മുടെ ആരുടേയും വീട്ടില്‍ കള്ളന്‍ കയറില്ലെന്ന് ആരും വിചാരിക്കരുത്. വീട് എത്ര സുരക്ഷിതമായാലും ഒരു ദിവസം കള്ളന്‍ കയറുമെന്ന് കുറ്റാന്വേഷണ വിദഗ്ധര്‍ പറയുന്നുണ്ട്' - അദ്ദേഹം ചൂണ്ടിക്കാട്ടി. 

നമ്മള്‍ സുരക്ഷിതരല്ല എന്നോര്‍ക്കണം. എപ്പോളെങ്കിലും എവിടെയെങ്കിലും അശ്രദ്ധ ഉണ്ടായിട്ട് അവിടെ അതൊക്കെ വന്നുചേരാന്‍ സാധ്യതയുണ്ടെന്ന് മറക്കരുത്. നമ്മള്‍ വിചാരിക്കും, ലഹരിയല്ലേ... ഞാന്‍ ലഹരി ഉപയോഗിക്കുന്നില്ലല്ലോ. എന്റെ കുട്ടി അത് ഉപയോഗിക്കില്ല... എന്ന് നമ്മള്‍ ആശ്വാസം കൊള്ളും.

പക്ഷെ, വാര്‍ത്തകള്‍ വരുമ്പോള്‍ അതിന് നേരെ വിപരീതമായ കാര്യങ്ങളാണ് സംഭവിക്കുന്നത്. കുട്ടികളുടെ കാര്യത്തില്‍ തീര്‍ച്ചയായും നിരീക്ഷണം വേണം. യുവാക്കളുടെയും യുവതികളുടെയും കാര്യത്തിലും നമ്മള്‍ ജാഗരൂകരാവേണ്ടതുണ്ട്' സാദിഖലി തങ്ങള്‍ വ്യക്തമാക്കി.