വയനാട്: വയനാട്ടിലെ മുണ്ടക്കൈ പുനരാധിവാസത്തിനായി കേന്ദ്രം അനുവദിച്ച 529.50 കോടിയുടെ വായ്പ സഹായം നഷ്ടപ്പെടാതിരിക്കാൻ വേഗത്തിലുള്ള നീക്കങ്ങൾ നടത്താൻ സംസ്ഥാന സർക്കാർ ഒരുങ്ങുന്നു. പ്രദേശത്തിന്റെ പുനരാധിവാസത്തിന്റെ നടത്തിപ്പ് വേഗത്തിലാക്കാൻ വകുപ്പുതല സെക്രട്ടറിമാരുടെ യോഗം വൈകാതെ ചേരും. ഈ വർഷം മാർച്ച് 31ഓടെ പണം കൃത്യമായി ചെലവഴിച്ചുകൊണ്ട് കണക്കുകൾ രേഖപ്പെടുത്തണമെന്ന് കേന്ദ്രസർക്കാർ നിർദ്ദേശം വെച്ചിരുന്നു. ഈ സാഹചര്യമാണ് സർക്കാരിനെ പ്രതിസന്ധിയിലാക്കിയിരിക്കുന്നത്. 

പ്രായോഗിക തടസ്സങ്ങളെ എങ്ങനെ മറികടക്കാം എന്ന വിഷയത്തെക്കുറിച്ച് സർക്കാർ തലങ്ങളിൽ യോഗങ്ങൾ തുടങ്ങിയിട്ടുണ്ട്. ഇതിന്റെ ഭാഗമായി വരും ദിവസങ്ങളിൽ ഉന്നത തല യോഗങ്ങളും നടക്കും. ചീഫ് സെക്രട്ടറി, വകുപ്പ് സെക്രട്ടറിമാർ, റവന്യു, പൊതുമരാമത്ത്, ധന എന്നിങ്ങനെയുള്ള 16 പദ്ധതികളുടെ ഭാഗമായിട്ടുള്ള മുഴുവൻ വകുപ്പ് സെക്രട്ടറിമാരുമാണ്‌ യോഗത്തിൽ പങ്കെടുക്കുക.

യോഗത്തിൽ പുതിയ കർമ്മപദ്ധതിക്കും രൂപം നൽകും. ഇതിന്റെ ഭാഗമായി നടപടി പ്രക്രിയകൾ വേഗത്തിൽ പൂർത്തീകരിച്ചുകൊണ്ട് പണം ചിലവാക്കിയെന്ന് ഉറപ്പാക്കാനുള്ള നടപടികളും സംസ്ഥാന സർക്കാർ നടപ്പിലാക്കും. എന്നാൽ ഇത് മാർച്ച് 31നുള്ളിൽ മുഴുവനായും പൂർണ്ണമാവില്ലെന്നും ഈ വിഷയം കേന്ദ്രസർക്കാരിനെ ബോധ്യപ്പെടുത്താം എന്നുമാണ് സംസ്ഥാന സർക്കാർ പ്രതീക്ഷിക്കുന്നത്.

മാർച്ച് 31നകം തന്നെ പണം ചെലവഴിച്ച് കണക്ക് നൽകണമെന്ന് കേന്ദ്രസർക്കാരിന്റെ ഈ നിർദേശം ചില പ്രായോഗിക ബുദ്ധിമുട്ടുകൾ സൃഷ്ടിക്കുന്നു എന്ന് ധനമന്ത്രി കെഎൻ ബാലഗോപാൽ അറിയിച്ചിരുന്നു. അതേസമയം സംസ്ഥാനങ്ങൾക്ക് മൂലധന നിക്ഷേപങ്ങൾക്കായി അനുവദിക്കുന്ന വായ്പയാണ് കേന്ദ്രസർക്കാർ വയനാടിന്റെ പുനരാധിവാസത്തിന് നൽകിയത്. സംസ്ഥാന സർക്കാരിന്റെ പ്രത്യേക ഗ്രാൻഡ് എന്ന ആവശ്യം കേന്ദ്രം ഇതുവരെ അംഗീകരിച്ചിട്ടില്ല.