തിരുപ്പൂര്‍: കേരളത്തില്‍ നിന്ന് മെഡിക്കല്‍ മാലിന്യവുമായി എത്തിയ ലോറി വീണ്ടും തമിഴ്‌നാട്ടില്‍ നിന്ന് പിടികൂടി. പാലക്കാട് നിന്ന് മാലിന്യവുമായി എത്തിയ ലോറി തിരുപ്പൂരില്‍ വെച്ചാണ് പിടികൂടിയത്. ആറുമാസമായി ഇവിടെ മാലിന്യങ്ങള്‍ എത്തിച്ച് കത്തിക്കുന്നുണ്ടെന്ന് നാട്ടുകാര്‍ ആരോപിച്ചു. തിരുപ്പൂര്‍ പല്ലടത്താണ് സംഭവം. 

ഇന്നലെ രാവിലെയാണ് പാലക്കാട് നിന്നും മാലിന്യവുമായി എത്തിയ ലോറി പിടികൂടിയത്. ഫാം ഹൌസ് ഉടമയുമായി ഉണ്ടാക്കിയ കരാറിന്റെ അടിസ്ഥാനത്തിലാണ് ഇവിടേക്ക് മെഡിക്കല്‍ മാലിന്യങ്ങളും പ്ലാസ്റ്റിക്കും എത്തിച്ച് കത്തിക്കുന്നത്.

നാട്ടുകാരാണ് മാലിന്യങ്ങള്‍ എത്തിച്ച ലോറി പിടികൂടി പൊലിസിന് കൈമാറിയത്. തമിഴ്‌നാട് കേരള സ്വദേശികളടക്കം മൂന്ന് പേരാണ് ഈ വാഹനത്തില്‍ ഉണ്ടായിരുന്നത്. ഇവരെയും പൊലീസിന് കൈമാറിയിട്ടുണ്ട്.