കോഴിക്കോട്: വടകര സാന്റ് ബാങ്ക്‌സില്‍ അഴിത്തല അഴിമുഖത്ത് ഫൈബര്‍ വള്ളം മറിഞ്ഞ് മത്സ്യബന്ധന തൊഴിലാളി മരിച്ചു. സാന്റ് ബാങ്ക്‌സിലെ കുയ്യന്‍ വീട്ടില്‍ അബൂബക്കര്‍ (62) ആണ് മരിച്ചത്. കൂടെയുണ്ടായിരുന്ന ഇബ്രാഹിം  രക്ഷപെട്ടു. 

ഇന്ന് പുലര്‍ച്ചെ 4 മണിയോടെയാണ് സംഭവം. അഴിത്തല ഭാഗത്ത് മീന്‍ പിടിക്കാന്‍ വള്ളവുമായി പോയതായിരുന്നു രണ്ട് പേരും. ഇതിനിടെ ഫൈബര്‍ വള്ളം തിരമാലയില്‍ മറിയുകയായിരുന്നു.

അപകടത്തില്‍ പെട്ട വള്ളം കണ്ടെത്താനായിട്ടില്ല. കടലും പുഴയും സംഗമിക്കുന്ന ഭാഗത്താണ് അപകടം നടന്നത്. നേരത്തെ ഈ ഭാഗത്തുണ്ടായ അപകടങ്ങളില്‍ നിരവധി പേര്‍ക്ക് ജീവന്‍ നഷ്ടമാവുകയും പരുക്കേല്‍ക്കുകയും ചെയ്തിരുന്നു.