മനാമ: തലസ്ഥാന നഗരിയിൽ സഞ്ചാരികളെ സ്വാഗതം ചെയ്യുന്നതിനായി ബഹ്റൈൻ പൊലിസിൻ്റെ ആഭിമുഖ്യത്തിൽ ഹാജാന ടീം (ഒട്ടക സേന) എത്തിയത് കാഴ്ചക്കാർക്ക് ഏറെ കൗതുകമായി. വിനോദ സഞ്ചാരികളുടെ വരവിനെ തുടർന്നാണ് കഴിഞ്ഞ ദിവസം ബാബ് അൽ ബഹ്റൈനിൽ പൊലിസ് ടീമിൻ്റെ ഒട്ടക സേനയിൽ നിന്നുള്ള രണ്ട് ഒട്ടകങ്ങൾ എത്തിയത്. അതേസമയം ടൂറിസം സ്പോട്ടായി കരുതപ്പെടുന്ന ബാബ് അൽ ബഹ്റൈനിൽ പൊലിസ് സംഘങ്ങളോടൊപ്പം ഒട്ടകങ്ങളുടെ ഫോട്ടോ എടുക്കാനുള്ള സൗകര്യവും ഒരുക്കിയിരുന്നു.

ഇതേ തുടർന്ന് വിദേശികളും സ്വദേശികളുമായ നിരവധി പേരാണ് ഒട്ടക സംഘത്തോടൊപ്പം ഫോട്ടോയും വിഡിയോയും എടുക്കാനായി എത്തിയത്.  മികച്ച കാലാവസ്‌ഥയായതിനാൽ ബഹ്റൈനിൽ വിദേശ സന്ദർശകരുടെ തിരക്കാണിപ്പോൾ. സന്ദർശകരിൽ ഏറെയും സ്പെയിൻ, തായ്‌ലൻഡ്, മാലിദ്വീപ്, സൗത്ത് ആഫ്രിക്ക, ഇന്തൊനീഷ്യ, തുടങ്ങിയ രാജ്യങ്ങളിൽ നിന്നുള്ളവരാണ്.

ഡിസംബറിൽ സന്ദർശകർക്കായി നിരവധി സാംസ്കാരിക പരിപാടികൾ വിവിധ ഇടങ്ങളിൽലായി ഒരുക്കിയിട്ടുണ്ട്. കൂടാതെ ഹോട്ടലുകളിൽ പ്രശസ്തരുടെ മ്യൂസിക് ബാൻഡുകളും പ്രത്യേകം പാക്കേജുകളും ഒരുക്കിയിട്ടുണ്ട്. സന്ദർശകർ എത്തിയതോടെ മനാമയിലെ സൂഖുകളും സജീവമാണ്. പ്രാദേശിക നെയ്ത്തു വസ്ത്രങ്ങളും ബഹ്റൈൻ കര കൗശല വസ്‌തുക്കളുടേയും വലിയ ശേഖരം ഒരുക്കി വിപണിയും സന്ദർശകർക്കായി ഒരുങ്ങിയിട്ടുണ്ട്.

 In a unique initiative, Bahrain's Bab Al Bahrain has introduced a camel squad to welcome tourists, offering a fascinating glimpse into the country's rich heritage and culture.