കോഴിക്കോട്: വിവാദമായ വഖ്ഫ് ഭേദഗതി നിയമം കൊണ്ടുവരാനുള്ള നീക്കം നരേന്ദ്രമോദി സര്‍ക്കാര്‍ തുടങ്ങുകയും ഇതോടൊപ്പം കേരളത്തിലെ മുനമ്പത്ത് ഉള്‍പ്പെടെ വഖ്ഫ് ഭൂമികള്‍ ഒരുവിഭാഗം വിവാദമാക്കുകയും ചെയ്യുന്നതിനിടെ ഉയര്‍ന്നു കേള്‍ക്കുന്ന വിശേഷണമാണ്, ഇന്ത്യയില്‍ സര്‍ക്കാര്‍ കഴിഞ്ഞാല്‍ ഏറ്റവും വലിയ ഭൂവുടമയാണ് വഖ്ഫ് ബോര്‍ഡുകള്‍ എന്നത്. എന്നാല്‍ അതു തെറ്റാണെന്നും വഖ്ഫ് ബോര്‍ഡല്ല മറിച്ച് സര്‍ക്കാര്‍ കഴിഞ്ഞാല്‍ ഇന്ത്യയിലെ ഏറ്റവും വലിയ ഭൂവുടമ കത്തോലിക്കാ സഭ (Catholic Church of India) ആണെന്നും രേഖകള്‍ വ്യക്തമാക്കുന്നു.

ഗവണ്‍മെന്റ് ലാന്‍ഡ് ഇന്‍ഫര്‍മേഷന്‍ വെബ്‌സൈറ്റില്‍ (Government Land Information website) നിന്നുള്ള വിവരങ്ങളുടെ അടിസ്ഥാനത്തില്‍ 2021 ഫെബ്രുവരിയിലെ കണക്കനുസരിച്ച് കേന്ദ്രസര്‍ക്കാരിന് ഏകദേശം 15,531 ചതുരശ്ര കിലോമീറ്റര്‍ ഭൂമിയാണുള്ളത്. 116 പൊതുമേഖലാ കമ്പനികളും 51 മന്ത്രാലയങ്ങളുമാണ് ഭൂമി ഉപയോഗിക്കുന്നത്. കേന്ദ്രസര്‍ക്കാരിന് കീഴില്‍ റെയില്‍വേക്കാണ് കൂടുതല്‍ ഭൂമിയുള്ളത്. അതുകഴിഞ്ഞാല്‍ പ്രതിരോധമന്ത്രാലയത്തിനും.

സര്‍ക്കാര്‍ കഴിഞ്ഞാല്‍ കത്തോലിക്കാ സഭയാണ് കൂടുതല്‍ ഭൂമി കൈവശംവച്ചിരിക്കുന്നത്. കത്തോലിക്കാ സഭയ്ക്ക് ഇന്ത്യയിലുടനീളം ഏഴു കോടി ഹെക്ടര്‍ (17.29 കോടി ഏക്കര്‍) ഭൂമിയാണുള്ളത്. പള്ളികള്‍, കോളേജുകള്‍, സ്‌കൂളുകള്‍ എന്നിവയുള്‍പ്പെടെ നിരവധി കെട്ടിടങ്ങളുള്ള ഈ ഭൂമികളുടെ ആകെ മൂല്യം ഏകദേശം 20,000 കോടി രൂപയോളം വരും.

ഇന്ത്യക്ക് സ്വാതന്ത്ര്യം ലഭിക്കുന്നതിന് മുമ്പ് തന്നെ (1947ന് മുമ്പ്) ഇന്ത്യയിലെ കത്തോലിക്കാ സഭയ്ക്ക് ബ്രിട്ടീഷ് ഭരണകൂടത്തില്‍നിന്നാണ് ഭൂരിഭാഗം ഭൂമിയും ലഭിച്ചത്. ബ്രിട്ടീഷ് സാമ്രാജ്യത്വത്തിന് കീഴില്‍ 1927ല്‍ ഇന്ത്യന്‍ ചര്‍ച്ച് ആക്ട് പാസാക്കിയതുവഴിയാണ് ഇപ്രകാരം ഭൂമിയുടെ ഉടമസ്ഥാവകാശം സഭ ഉറപ്പാക്കിയത്. അതേസമയം, ഇതിനകം ഉടമസ്ഥതയിലുള്ള ചില ഭൂമികള്‍ക്ക് മേല്‍ തര്‍ക്കം നിലനില്‍ക്കുന്നുമുണ്ട്.

കാത്തലിക് ബിഷപ്പ് കോണ്‍ഫറന്‍സ് ഓഫ് ഇന്ത്യ (CBCI) ആണ് കത്തോലിക്കാ സഭയെ നിയന്ത്രിക്കുന്നത്. 2012ല്‍ ഇന്ത്യയില്‍ 2,457 ആശുപത്രി ഡിസ്‌പെന്‍സറികള്‍, 240 മെഡിക്കല്‍ അല്ലെങ്കില്‍/കോളജുകള്‍, 28 ജനറല്‍ കോളജുകള്‍, 5 എഞ്ചിനീയറിംഗ് കോളജുകള്‍, 3765 സെക്കന്‍ഡറി സ്‌കൂളുകള്‍, 7319 പ്രൈമറി സ്‌കൂളുകള്‍, 3187 നഴ്‌സറി സ്‌കൂളുകള്‍ തുടങ്ങിയവ കത്തോലിക്കാ സഭക്ക് കീഴിലുണ്ട്.

ബ്രിട്ടീഷ് സര്‍ക്കാര്‍ പാട്ടത്തിന് അനുവദിച്ച ഒരു ഭൂമിക്കും നിയമസാധുയതില്ലെന്ന് 1965ല്‍ കേന്ദ്ര സര്‍ക്കാര്‍ സര്‍ക്കുലര്‍ പുറപ്പെടുവിച്ചിരുന്നു. ഈ നിര്‍ദ്ദേശം പൂര്‍ണമായും നടപ്പാക്കത്തതിനാല്‍ സഭയ്ക്ക് കീഴിലുള്ള ചില ഭൂമികളുടെ നിയമസാധുത സംബന്ധിച്ച തര്‍ക്കത്തിന് ഇതുവരെ പരിഹാരമായിട്ടില്ല. 

Not Waqf Board but Catholic Church is India’s Second Largest Landowner